ჩრდილოეთ კორეამ ბალისტიკური რაკეტები გაუშვა
ჩრდილოეთ კორეამ იაპონიის ზღვისკენ მცირე რადიუსის რამდენიმე ბალისტიკური რაკეტა გაუშვა, - ამის შესახებ საინფორმაციო სააგენტო Yonhap-ი სამხრეთ კორეის შეიარაღებული ძალების შტაბის უფროსთა კომიტეტზე დაყრდნობით იუწყება.
"ჩრდილოეთ კორეის რაკეტებმა დაახლოებით 360 კილომეტრი იფრინეს და აღმოსავლეთის ზღვაში ჩაეშვნენ“, - აცხადებენ სამხრეთ კორეის შეიარაღებული ძალების შტაბის უფროსთა კომიტეტში, თუმცა რაკეტების რაოდენობას არ აკონკრეტებენ.
სამხრეთ კორეა ბალისტიკური რაკეტების გაშვებას გმობს და პროვოკაციად აფასებს.
„ყურადღებით ვაკვირდებით ჩრდილოეთ კორეის სხვადასხვა ქმედებებს. სამხრეთ კორეისა და შეერთებული შტატების ძლიერი ერთობლივი თავდაცვის ნაწილის ფარგლებში, ვინარჩუნებთ უმაღლეს შესაძლებლობებს და მზად ვიქნებით ვუპასუხოთ ნებისმიერ პროვოკაციას“, - აცხადებენ სამხრეთ კორეის შეიარაღებული ძალების შტაბის უფროსთა კომიტეტში.
ცნობისთვის, რამდენიმე დღის წინ ფხენიანმა განაცხადა, რომ სამხრეთ კორეას და შეერთებულ შტატებს ერთობლივი წვრთნებისთვის "მაღალი ფასის" გადახდა მოუწევთ. 9 სექტემბერს ჩრდილოეთ კორეის ლიდერმა, კიმ ჩენ ინმა განაცხადა, რომ მისი ქვეყანა გააგრძელებს ბირთვული ძალების გაძლიერების პოლიტიკას, რათა მიაღწიოს ბირთვული იარაღის რაოდენობის ექსპონენციურ ზრდას.
v-if="article.gallery" v-html="article.gallery"
