აშშ-ში რუსეთის მოქალაქე დააკავეს, რომელიც რუსეთში უპილოტო საფრენი აპარატების ტექნოლოგიების უკანონო ექსპორტს ახორციელებდა, - ამის შესახებ ინფორმაციას აშშ-ის იუსტიციის დეპარტამენტი ავრცელებს.

აშშ-ის იუსტიციის დეპარტამენტის ცნობით, დაკავებული რუსეთის მოქალაქე, დენის პოსტოვოი ფლორიდის შტატში, ქალაქ სარასოტაში ცხოვრობდა და მას ბრალად ექსპორტზე დაწესებული შეზღუდვების დარღვევა, ფულის გათეთრება და დრონების წარმოებისთვის საჭირო ტექნოლოგიის რუსეთში უკანონო ექსპორტი ედება.

საბრალდებო დასკვნაში ნათქვამია, რომ 2022 წელს უკრაინაში რუსეთის სრულმასშტაბიანი შეჭრის შემდეგ, პოსტოვოიმ მიკროელექტრონული კომპონენტები შეიძინა და რუსეთში მათი უკანონო ექსპორტი განახორციელა.

აშშ-ის იუსტიციის დეპარტამენტის განცხადებით, ბრალდებულმა საექსპორტო დოკუმენტებში ცრუ ინფორმაცია მიუთითა და რუსეთში ტექნოლოგია სხვა ქვეყნების, მათ შორის, ჰონგ-კონგისა და შვეიცარიის გავლით გაგზავნა.