ოკუპირებული აფხაზეთის ე.წ. პარლამენტმა სასამართლო გადაწყვეტილებების შესახებ შეთანხმების რატიფიცირება მოახდინა, - ამის შესახებ ინფორმაციას „რადიო თავისუფლების“ პროექტი „ეხო კავკაზა“ ავრცელებს.

„ეხო კავკაზას“ ცნობით, „ეკონომიკურ საკითხებში სასამართლო და საარბიტრაჟო გადაწყვეტილებების აღიარებისა და აღსრულების შესახებ“ შეთანხმების რატიფიცირებას მხარი 27-მა ე.წ. დეპუტატმა დაუჭირა, ხოლო ორმა თავი შეიკავა.

„შეთანხმების რატიფიცირება ჩვენს ეროვნულ მეწარმეებს ახალ შესაძლებლობებს გაუხსნის და საშუალებას მოგვცემს, რომ მათ მხარი დავუჭიროთ“, - განაცხადა ე.წ. იუსტიციის სამინისტროს ხელმძღვანელმა, ანრი ბარციცმა.

ცნობისთვის, მოსკოვმა ე.წ. პარლამენტის მიერ აღნიშნული შეთანხმების დამტკიცების მოთხოვნით 1-ელი სექტემბრიდან ოკუპირებული აფხაზეთის ბიუჯეტის დაფინანსება შეაჩერა.