არჩევნებამდე ივანიშვილის ხელისუფლებისგან კიდევ უამრავ უმსგავსობას და სახის დაკარგვას ვნახავთ - ხელისუფლება, რომელსაც საკუთარი მოქალაქეებისთვის დაშინებისა და ფსიქოლოგიური ზემოქმედების გარდა არაფერი აქვს სათქმელი, დასრულებულია, - ასე ეხმაურება “ერთიანობა-ნაციონალური მოძრაობის” წევრი, დეპუტატი პაატა მანჯგალაძე “ქართული ოცნების“ საარჩევნო ბანერებს.

მანჯგალაძის შეფასებით, ყველაფერი “ქართული ოცნების“ სისუსტეზე და მოახლოებული პოლიტიკური აღსასრულის დადგომაზე მიუთითებს.

“ხელისუფლება, რომელსაც საკუთარი მოქალაქეებისთვის დაშინებისა და ფსიქოლოგიური ზემოქმედების გარდა არაფერი აქვს სათქმელი, დასრულებულია.

ეს იმას არ ნიშნავს, რომ გამარჯვება თავისით მოვა. ახლა ყველა ოპოზიციური ძალის მთავარი საზრუნავი, მთავარი საკეთებელი უნდა გახდეს ამ მოახლოებული გამარჯვების რწმენის ყველა ქართულ ოჯახამდე მიტანა. ჩვენ არ ავყვებით „ქოცებს“ უმსგავსობაში, გამარჯვება ახლოსაა!

წინ ევროპისა და კეთილდღეობისკენ!

არა იზოლაციასა და სიღატაკეს!“, - განაცხადა პაატა მანჯგალაძემ

დღეს, დილით ქუჩებში პარტია “ქართული ოცნების“ ახალი საარჩევნო ბანერები გამოჩნდა, რომელსაც აწერია “არა ომს! აირჩიე მშვიდობა!“. ბანერები ორ ნაწილად არის გაყოფილი. ბანერის ერთ მხარეს უკრაინაში რუსეთის მიერ განადგურებული ქალაქები, შენობები, ინფრასტრუქტურული ნაგებობია ასახული, ხოლო მეორე მხარეს საქართველოს ქალაქები. დაბომბილი უკრაინის ქალაქები წარმოდგენილია შავ-თეთრი ფოტოთი, ხოლო საქართველო - ფერადით.