ოკუპირებული აფხაზეთის გალის რაიონში ძლიერ ხანძარს ებრძვიან. ძლიერი ქარის გამო ცეცხლის საცხოვრებელ სახლებამდე მიღწევის საფრთხე არსებობს, რის გამოც სახანძრო განგაში გამოცხადდა, - ინფორმაციას ადგილობრივი და რუსული მედია საშუალებები ავრცელებენ.

მათივე ინფორმაციით, გალის რაიონის ადმინისტრაციამ მამაკაცებს მოუწოდა, გავიდნენ ქუჩებში და ყურადღებით დააკვირდნენ რა ხდება მათ ირგვლივ, საჭიროების შემთხვევაში კი სასწრაფოდ დაეხმარონ მეხანძრეებს.

„ძლიერი ქარის გამო ხანძარი სწრაფად ვრცელდება, მოსახლეობას საფრთხე ემუქრება“, - განაცხადა ოკუპირებული აფხაზეთის ე.წ. საგანგებო სიტუაციების სამინისტროს ხელმძღვანელმა, ლევ კვიცინიამ.

ხანძრის ყველაზე დიდი კერა სოფელ მახუნჯიაშია, რომელიც ქალაქ გალის სამხრეთით მდებარეობს. გალის რაიონის ე.წ. ხელმძღვანელმა, კონსტანტინე ფილიამ განაცხადა, რომ შესაძლოა, საჭირო გახდეს სოფლის მაცხოვრებლების ევაკუაცია.

გალელ მეხანძრეებს ეხმარებიან მეხანძრეები ენგურჰესიდან, ტყვარჩელიდან და ოჩამჩირედან.