ერაყში, ბაღდადის აეროპორტის მახლობლად მდებარე აშშ-ის სამხედრო ბაზა Victory-ზე სარაკეტო თავდასხმა განხორციელდა, - ინფორმაციას სააგენტო AFP-ი ავრცელებს.

სააგენტოს ერთ-ერთმა წყარომ განუცხადა, რომ ორი რაკეტა ბაზის თავდაცვითმა სისტემამ ჩამოაგდო, მესამე კი ანტიტერორისტული სარდლობის შტაბ-ბინასთან დაეცა. ეს ინფორმაცია კიდევ ერთმა წყარომ დაადასტურა და განმარტა, რომ თავდასხმის შედეგად არავინ დაშავებულა.

AFP აღნიშნავს, რომ ერაყში აშშ-ის ბაზებზე თავდასხმები ახლო აღმოსავლეთში კონფლიქტის ესკალაციის ახალი რაუნდის ფონზე გახშირდა, რომელიც 2023 წლის 7 ოქტომბერს ისრაელზე „ჰამასის“ თავდასხმის შემდეგ დაიწყო.

ერაყში ამჟამად, დაახლოებით, 2500 ამერიკელი ჯარისკაცია განლაგებული.