აფხაზეთის ავტონომიური რესპუბლიკის მთავრობის თავმჯდომარემ, ლევან მგალობლიშვილმა იმერეთის სახელმწიფო რწმუნებულის ადმინისტრაციაში პირველი ოფიციალური შეხვედრა გამართა. მთავრობის თავმჯდომარემ რეგიონის ხელმძღვანელ პირებს აფხაზეთის მთავრობის განახლებული შემადგენლობა წარუდგინა და იმერეთის მხარეში მცხოვრები დევნილი მოსახლეობის საჭიროებებზე ისაუბრა.

ამის შესახებ ინფორმაციას აფხაზეთის ავტონომიური რესპუბლიკის მთავრობა ავრცელებს.

მათი ცნობით, შეხვედრაზე სხვადასხვა სფეროში სამომავლოდ დაგეგმილ პროექტებსა და გეგმებზე ისაუბრეს, რომლებიც დევნილთა სოციალურ-ეკონომიკური მდგომარეობის გაუმჯობესებას შეუწყობს ხელს.

ლევან მგალობლიშვილმა იმერეთის სახელმწიფო რწმუნებულს და მუნიციპალიტეტის წარმომადგენლებს მადლობა გადაუხადა, აფხაზეთიდან დევნილ მოსახლეობაზე ზრუნვისა და თანადგომისათვის.

„დღეს ჩვენ ვესტუმრეთ იმერეთის რეგიონს. ეს იყო აფხაზეთის მთავრობის წევრებსა და ადგილობრივი ხელისუფლების წარმომადგენლებს შორის გაცნობითი ხასიათის შეხვედრა. იმერეთს ძალიან დიდი დევნილთა კომპაქტური ჩასახლებები აქვს. შესაბამისად, ჩვენი კომუნიკაცია ადგილზე ძალიან მნიშვნელოვანია მომავალში იძულებით გადაადგილებულ პირთა პრობლემების მოგვარების კუთხით“, - განაცხადა ლევან მგალობლიშვილმა.