ევროკომისია ისრაელსა და „ჰეზბოლას“ შორის მიმდინარე შეტაკებების შედეგად დაზარალებულ ლიბანს ჰუმანიტარული დახმარების სახით დამატებით 30 მილიონი ევროს გამოუყოფს.

„ძალიან შეშფოთებული ვარ ახლო აღმოსავლეთში დაძაბულობის მუდმივი ესკალაციის გამო. ყველა მხარემ ყველაფერი უნდა გააკეთოს უდანაშაულო მშვიდობიანი მოსახლეობის სიცოცხლის დასაცავად“, - განაცხადა ევროკომისიის პრეზიდენტმა, ურსულა ფონ დერ ლაიენმა.

აღნიშნული დახმარება ემატება 29 სექტემბერს უკვე გამოცხადებულ 10 მილიონ ევროს.

ლიბანის მთავრობის სტატისტიკის თანახმად, ლიბანში 1 900-ზე მეტი ადამიანი დაიღუპა და 9 000-ზე მეტი დაიჭრა საზღვრისპირა ბრძოლების დაწყების შემდეგ, თითქმის ერთი წლის განმავლობაში, აქედან უმეტესობა ბოლო ორ კვირაში დაფიქსირდა. პრემიერ-მინისტრის მოვალეობის შემსრულებელმა, ნაჯიბ მიქათმა განაცხადა, რომ ისრაელის თავდასხმების გამო, დაახლოებით, 1.2 მილიონი ლიბანელი იძულებით გადაადგილდა.