უკრაინაში საზენიტო-სარაკეტო სისტემა Patriot-ი ჩავიდა, რომელიც ქვეყანას რუმინეთმა გადასცა, - ამის შესახებ რუმინეთის თავდაცვის სამინისტროს წარმომადგენელმა, კონსტანტინე სპინუმ „რადიო თავისუფლების“ უკრაინულენოვან სამსახურს განუცხადა.

„ვადასტურებთ, რომ Patriot-ის სისტემა უკრაინაშია ჩასული,” - განაცხადა რუმინეთის თავდაცვის უწყების წარმომადგენელმა.

გარდა ამისა, უკრაინის პრეზიდენტმა, ვოლოდიმირ ზელენსკიმ სოციალურ პლატფორმა X-ზე მადლობა გადაუხადა ყველა ქვეყანას, რომლებიც უკრაინისთვის საჰაერო თავდაცვის სისტემების უზრუნველყოფას უწყობენ ხელს.

„განსაკუთრებული მადლობა რუმინეთს Patriot-ის სისტემისთვის, ჩვენ ერთად შეგვიძლია მივაღწიოთ კიდევ უფრო დიდ ეფექტურობას - ჩვენ შეგვიძლია დავასრულოთ რუსული ტერორი, ერთობლივი ძალისხმევით „შაჰედებისა“ და რაკეტების ჩამოგდებით“, - აღნიშნა ზელენსკიმ.

რუმინეთის ხელისუფლებამ პატრიოტის სისტემის უკრაინისთვის გადაცემის გადაწყვეტილება საბოლოოდ გასულ თვეში დაამტკიცა.