მარნეულის რაიონის სოფელ შაუმიანის დევნილთა დასახლებაში რელიგიის საკითხთა სახელმწიფო სააგენტოსა და საქართველოს ქრისტიან-ბაპტისტთა ეკლესიების გაერთიანების ერთობლივი საქველმოქმედო აქცია გაიმართა. ინფორმაციას რელიგიის საკითხთა სახელმწიფო სააგენტო ავრცელებს.

როგორც გავრცელებულ ინფორმაციაშია ნათქვამი, დასახლებაში მცხოვრებ ცხინვალის რეგიონიდან დევნილ 207 ოჯახს აქციის მონაწილეებმა ჰუმანიტარული დახმარება, საერთაშორისო ორგანიზაცია „ფრიდენს ბოტესგან“ - 18 ფუთა ტანსაცმელი და საერთაშორისო ორგანიზაცია „დახმარების საერთაშორისო ცენტრისგან" - 54 ყუთი (730 კგ.) ბრინჯი გადასცეს.

“სამხრეთ ოსეთის ადმინისტრაციის ხელმძღვანელმა თამაზ ბესტაევმა რელიგიის სააგენტოსა და საქართველოს ქრისტიან-ბაპტისტთა ეკლესიების გაერთიანებას მადლობა გადაუხადა სოციალური პროექტის განხორციელებისთვის.

საქველმოქმედო აქციაში მონაწილეობდნენ რელიგიის საკითხთა სახელმწიფო სააგენტოს სტრატეგიული კვლევის, ანალიზისა და რეგიონების სამსახურის უფროსი ნინო ჭავჭავაძე, რელიგიის სააგენტოს ქვემო ქართლის რეგიონული წარმომადგენელი აბაი ფაშაევი, ქრისტიან-ბაპტისტთა ეკლესიების გაერთიანების აღმასრულებელი მდივანი ტარიელ პაპინაშვილი, სამხრეთ ოსეთის ადმინისტრაციის ხელმძღვანელი თამაზ ბესტაევი და ხელმძღვანელის მოადგილე გივი ჯაფარიძე”, - ნათქვამია ინფორმაციაში.