გუშინდელი და გუშინწინდელი "ქარდები" არასწორ ინფორმაციას და ბრალდებებს შეიცავდა, ეს ძალიან სამწუხაროა, - ასე აფასებს პრემიერ-მინისტრი, ირაკლი კობახიძე საქართველოში ამერიკის საელჩოს მიერ ბოლო დღეებში “ფეისბუქ” გვერდზე გამოქვეყნებულ განცხადებებს.

პრემიერი ამერიკის ელჩს, რობინ დანიგანს სთხოვს უფრო ღრმად ჩაიხედოს საკუთარი თანამშრომლების საქმიანობაში.

“ქარდები არის ცოტა გაუგებარი. ამასთან დაკავშირებით სხვა კომენტარს არ გავაკეთებ. სამწუხარო ის არის, რომ გუშინდელი და გუშინწინდელი "ქარდები" არასწორ ინფორმაციას და ბრალდებებს შეიცავდა. ეს ძალიან სამწუხაროა. დღევანდელი ქარდიც გაუგებარი იყო, თუმცა ეს, რა თქმა უნდა, საელჩოს საქმეა. მე ვთხოვდი ქალბატონ ელჩს უფრო ღრმად ჩაიხედოს საკუთარი თანამშრომლების საქმიანობაში, მათ შორის, მათ ვინც ამ ქარდებს ავრცელებენ”, - განაცხადა კობახიძემ.

ამასთან, მთავრობის მეთაურის თქმით, აშშ-ს დაფინანსებით მოქმედი არასამთავრობო ორგანიზაცია ხელისუფლებას აბრალებდა არჩევნების 46 ათასი ხმით გაყალბებას, რაც ოპოზიციისთვის გახდა საბაბი იმისა, რომ ეცადათ ხელისუფლების შეცვლა ხალხის ნების წინააღმდეგ.

“საელჩომ არასწორი ინფორმაცია გაავრცელა იმასთან დაკავშირებით, რომ თითქოს ცდომილება პივიტსა და ცესკოს შორის მხოლოდ 1.8%-ი იყო, სინამდვილეში 2.4%-ი იყო. მეორე მანიპულაცია მდგომარეობდა იმაში, რომ 2.4%-ით ISFED-ი “ქართულ ოცნებას” ბრალად სდებდა 46 000 ხმის გაყალბებას. საელჩომ ამას უწოდა, რაღაც უმნიშვნელო ხარვეზი. ეს არ იყო უმნიშვნელო ხარვეზი. შეგახსენებთ, რომ ეს იყო უხეში ბრალდება, აშშ-ს დაფინანსებით მოქმედი არასამთავრობო ორგანიზაცია გვაბრალებდა არჩევნების 46 ათასი ხმით. ეს ოპოზიციისთვის მთავარ საბაბად იქცა, რომ ეცადათ ხელისუფლების შეცვლა ხალხის ნების წინააღმდეგ. ამას საელჩო უწოდებს უმნიშვნელო შეცდომას. ვაპირებ, რომ პირადადაც გავუზიარო ელჩს ჩემი მოსაზრებები, ჯერ გადართული ვართ საარჩევნო პროცესებზე”,- განაცხადა კობახიძემ.