საქართველოს სავაჭრო პალატის, საქართველოს საერთაშორისო საარბიტრაჟო ცენტრის, ადგილობრივი და საერთაშორისო იურიდიული ფირმების ორგანიზებით, "არბიტრაჟის დღეები 2024" მიმდინარეობს, რომელსაც 200-მდე საერთაშორისო და ადგილობრივი არბიტრი, იურისტი და ექსპერტი ესწრება.

საქართველოს სავაჭრო პალატის ცნობით, ღონისძიება მისასალმებელი სიტყვით სავაჭრო პალატის პრეზიდენტმა გიორგი პერტაიამ, საქართველოს იუსტიციის მინისტრის მოადგილემ ბექა ძამაშვილმა და საქართველოს საერთაშორისო საარბიტრაჟო ცენტრის გენერალურმა მდივანმა ბექა ინჯიამ გახსნეს.

გიორგი პერტაიას განცხადებით, სავაჭრო პალატა აქტიურად არის ჩართული საქართველოში ყოველწლიური არბიტრაჟის დღეების ორგანიზებასა და საქართველოში არბიტრაჟის განვითარებაში.

„სავაჭრო პალატის წევრებისთვის, ზოგადად ქართული ბიზნესისთვის, განსაკუთრებით, მცირე და საშუალო მეწარმეებისთვის მნიშვნელოვანია, ალტერნატიული დავების გადაწყვეტის მექანიზმების განვითარება. ჩვენ ვცდილობთ, რომ მეტი უცხოელი მოვიზიდოთ და გავზარდოთ ცნობადობა რეგიონში, იმისათვის რომ საქართველოში არსებული არბიტრაჟი მიმზიდველი იყოს არა მხოლოდ ქართული, არამედ რეგიონში არსებული უცხოური კომპანიებისთვის“, - განაცხადა სავაჭრო პალატის პრეზიდენტმა.

საქართველოს სავაჭრო პალატის ცნობით, ორდღიანი ღონისძიების ფარგლებში იმართება პანელური დისკუსიები და სოციალური ღონისძიებები, რომელიც საუკეთესო შესაძლებლობაა ადგილობრივი და უცხოელი მონაწილეებისთვის,რათა დაამყარონ კავშირები არბიტრაჟის პრაქტიკოსებთან. კონფერენციის მთავარი მომხსენებელია საერთაშორისო იურიდიული კომპანია White & Case-ის პარტნიორი ჩარლზ ნაირაკი, რომელიც მსოფლიოში ერთ-ერთი წამყვანი პრაქტიკოსი იურისტია არბიტრაჟის სფეროში.

არბიტრაჟის დღეები საქართველოში, წელს უკვე მეთერთმეტედ ტარდება.