საქართველოს ტექნიკურ უნივერსიტეტში, სამართლისა და საერთაშორისო ურთიერთობების ფაკულტეტის სტუდენტებისა და პროფესორ-მასწავლებელთა კოლაბორაციით გადაღებული ანიმაციური ფილმის - „იცოდე შენი უფლებების შესახებ“ - საპრემიერო ჩვენება და საჯარო ლექცია გაიმართა. ამის შესახებ ინფორმაციას საქართველოს ტექნიკური უნივერსიტეტი ავრცელებს.

სტუ-ის ცნობით, მოკლემეტრაჟიანი ანიმაციური ფილმი საქართველოს კონსტიტუციის ევოლუციას ასახავს.

საუნივერსიტეტო პროექტმა დაფინანსება საქართველოს იუსტიციის სამინისტროს საგრანტო პროგრამის ფარგლებში მოიპოვა.

გამარჯვებული საგრანტო პროექტის ავტორები არიან სტუ-ის სამართლისა და საერთაშორისო ურთიერთობების ფაკულტეტის სტუდენტი თამარ ბოლოთაური, ყოფილი სტუდენტი გულჩინა ახმედოვა, ასევე, ფაკულტეტის პროფესორები - სოფო დემეტრაშვილი და „ქრისტიანული კულტურის კვლევების ლაბორატორიის“ ხელმძღვანელი, კახა ძაგანია. ფილმი, ცნობილ მხატვარ-კარიკატურისტ ზაალ სულაკაურთან თანამშრომლობით, 6 თვის მანძილზე იქმნებოდა.

ფილმის ჩვენების შემდეგ ავტორები მიშელ მუსხელის დიპლომატიური ოსტატობის სასწავლო-პრაქტიკულ ლაბორატორიაში შეკრებილ საზოგადოებას მოკლემეტრაჟიანი ანიმაციის შექმნის ინიციატივის, ასევე, საქართველოში კონსტიტუციონალიზმის განვითარების შესახებ ესაუბრნენ.

როგორც სტუ-ის სამართლისა და საერთაშორისო ურთიერთობების ფაკულტეტის დეკანმა, პროფესორმა, ირაკლი გაბისონიამ აღნიშნა, ანიმაციურ ფილმში გასაგებად და ლაკონიურად არის გადმოცემული გზა, რომელიც საქართველოს კონსტიტუციამ განვლო.

მისი თქმით, ფილმი საინტერესო და ინფორმატიულია ნებისმიერი ასაკის მოქალაქისთვის.

„სახელმწიფოებრიობა, პოლიტიკური და სამართლებრივი კულტურა საქართველოში რამდენიმე ათასწლეულის განმავლობაში ყალიბდებოდა. ჩვენს ისტორიაში მრავლად არის სამართლის ძეგლები, რომლებიც კონსტიტუციური სამართლის წყაროს მიეკუთვნება, თუმცა კონსტიტუციონალიზმის საწყისად 1918 წლის 26 მაისი და ეროვნული საბჭოს მიერ მიღებული პირველი კონსტიტუციური ხასიათის დოკუმენტი - საქართველოს დამოუკიდებლობის აქტი მიიჩნევა, რასაც უმნიშვნელოვანესი დოკუმენტის - 1921 წლის 21 თებერვლის პირველი კონსტიტუციის მიღება მოჰყვა. პროექტის ავტორები შეეცადნენ საქართველოს კონსტიტუციის განვლილი გზა მოკლემეტრაჟიან ანიმაციაში გასაგებად და ლაკონიურად გადმოეცათ, ისეთი ხერხებით, რომ საინტერესო და ინფორმატიული ყოფილიყო ნებისმიერი ასაკის მოქალაქისთვის. სასიხარულოა, რომ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის სტუდენტებისა და პროფესორ-მასწავლებლების ერთობლივმა ინიციატივამ პროექტის სახე მიიღო და იუსტიციის სამინისტროს საგრანტო პროგრამის გამარჯვებული გახდა“, - აღნიშნა ირაკლი გაბისონიამ.

ცნობისათვის, იუსტიციის სამინისტროს საგრანტო კონკურსი, ადამიანის უფლებათა დაცვის გაძლიერების, სამართლებრივი უსაფრთხოების განმტკიცების, სამოქალაქო საზოგადოების მონაწილეობის ხელშეწყობისა და სამოქალაქო ინიციატივების მხარდაჭერის მიზნით, ყოველწლიურად ცხადდება.