ხალხს მობეზრდა ტყუილი დაპირებები, სიძულვილის პოლიტიკა, რომელსაც ივანიშვილის პარტია თესავს და ავრცელებს ქვეყანაში - ისე როგორც მთელ საქართველოში, საგარეჯოშიც ძალიან კარგად ჩანს, რომ ხალხს ცვლილებები სურს! – ეს განცხადება “ერთიანობა - ნაციონალური მოძრაობის“ ერთ-ერთმა ლიდერმა ლევან ბეჟაშვილმა საგარეჯოს რაიონში გააკეთა, სადაც კოალიციის წარმომადგენლები მოსახლეობას შეხვდნენ.

როგორც ბეჟაშვილმა აღნიშნა, დარწმუნებულია, რომ ეს ადამიანები მხარს “ერთიანობა - ნაციონალურ მოძრაობას“ და ქვეყნის ევროპულ მომავალს დაუჭერენ.

„ჩვენ მოსახლეობასთან შეხვედრას განვაგრძობთ. ვიმყოფებით საგარეჯოს რაიონში, იორმუღანლოს ზონის სოფლებში. აქაც კარგად ჩანს, რომ „ქართული ოცნება“ არჩევნებს აგებს. ხალხს მობეზრდა ტყუილი დაპირებები, სიძულვილის პოლიტიკა, რომელსაც ივანიშვილის პარტია თესავს და ავრცელებს ქვეყანაში.

ხალხს ცვლილებები უნდა. დარწმუნებული ვარ ეს ადამიანები ისე როგორც მთელი ამ წლების განმავლობაში საქართველოს ეროვნულ ინტერესებს უერთგულებენ და მხარს დაუჭერენ “ერთიანობა - ნაციონალურ მოძრაობას“ იმისათვის, რომ ჩვენ ყველამ ერთად გავიმარჯვოთ და ამ ქვეყანას ევროპული მომავალი მოვუპოვოთ“, - განაცხადა ლევან ბეჟაშვილმა.