„ერთიანობა-ნაციონალური მოძრაობის“ ლიდერის, თინა ბოკუჩავას განცხადებით, პარტნიორები ხედავენ, რომ პროდასავლურ ქართველ ხალხს ანტიდასავლური ხელისუფლება ართმევს ევროპული განვითარების შანსს. მისი თქმით, 26 ოქტომბრის არჩევნებზე ყურადღება ამიტომაც არის გამახვილებული. აღნიშნული განცხადებით, თინა ბოკუჩავა გამოეხმაურა აშშ-ის სახელმწიფო დეპარტამენტის პრესსპიკერის, მეთიუ მილერის განცხადებას, რომ აშშ საქართველოში არჩევნებს „ახლოდან დააკვირდება“.

„პარტნიორები ხედავენ, რომ პროდასავლურ ქართველ ხალხს, რომლებმაც გააკეთეს ევროატლანტიკური არჩევანი, დღეს ჰყავს ანტიდასავლური ხელისუფლება, რომელიც გვართმევს ევროპული კეთილდღეობის შანსს. სწორედ ამიტომ არის ასეთი გაფაციცებული ყურადღება საქართველოზე და არჩევნებზე, რომელიც 10 დღეში გველოდება, რომ ამ არჩევნებმა ასახოს ქართველი ხალხის ნება. ეს, მათ შორის, არის იმის გარანტია, რომ ივანიშვილი ვერ გაბედავს ქართველი ხალხისთვის საკუთარი არჩევანის მოპარვას – არჩევანის, რომელიც აუცილებლად ევროპული იქნება“, - განაცხადა თინა ბოკუჩავამ.