დიდმა ბრიტანეთმა და საფრანგეთმა ღაზაში არსებული ჰუმანიტარული სიტუაციის განსახილველად გაერო-ს უშიშროების საბჭოს სხდომა მოიწვიეს. ამის შესახებ დიდი ბრიტანეთის პრემიერ-მინისტრმა, კირ სტარმერმა განაცხადა.

„ისრაელმა ყველა შესაძლო ნაბიჯი უნდა გადადგას, რათა მშვიდობიანი მოსახლეობის მსხვერპლი თავიდან აიცილოს, ღაზაში გაცილებით მეტი დახმარების შესვლა დაუშვას და გაერო-ს ჰუმანიტარულ პარტნიორებს ეფექტიანად მოქმედების საშუალება მისცეს“, - განაცხადა კირ სტარმერმა.

ამასთან, დიდი ბრიტანეთის პრემიერმა პარლამენტში სიტყვით გამოსვლისას აღნიშნა, რომ მთავრობა ისრაელის ეროვნული უსაფრთხოების მინისტრის, იტამარ ბენ გვირისა და ფინანსთა მინისტრის, ბეზალელ სმოტრიჩის წინააღმდეგ სანქციების დაწესებას განიხილავს, მათ მიერ გაკეთებული განცხადებების გამო, რომელთა მიხედვითაც, ღაზაში მშვიდობიანი მოქალაქეების შიმშილი შეიძლება გამართლებული იყოს და ახალმოსახლეებს, რომლებიც დასავლეთ სანაპიროზე ძალადობას მიმართავენ, გმირები უნდა ეწოდოთ.

„ჩვენ ამას განვიხილავთ, რადგან ისინი ნამდვილად ამაზრზენი კომენტარებია“, - აღნიშნა კირ სტარმერმა.