ვოლოდიმირ ზელენსკიმ ევროკავშირის ლიდერებს „გამარჯვების გეგმა“ წარუდგინა. უკრაინის პრეზიდენტი ევროპული საბჭოს სხდომაზე სიტყვით გამოვიდა და აღნიშნა, რომ ევროპის ერთობა არა მხოლოდ უკრაინის, არამედ მთლიანად ევროპელი ხალხის უსაფრთხოებას უზრუნველყოფს.

„ჩვენ „მშვიდობის ფორმულის“ ფარგლებში ოთხი შეხვედრა გავმართეთ. მეხუთე დღეს საფრანგეთში ჩატარდება. მასპინძლობისთვის საფრანგეთის მადლობელი ვარ. ჩვენ ნოემბერში სრულფასოვან დოკუმენტს შევიმუშავებთ, რომელიც „მშვიდობის ფორმულაზე“ იქნება დაფუძნებული და მას მშვიდობის სამიტზე ყველას გავუზიარებთ, მათ შორის რუსებსაც“, - განაცხადა ვოლოდიმირ ზელენსკიმ.

მისივე თქმით, „გამარჯვების გეგმის“ მიზანს არა მხოლოდ უკრაინის, არამედ მთელი ევროატლანტიკური საზოგადოების გაძლიერება წარმოადგენს.

„თუ ახლა დავიწყებთ და „გამარჯვების გეგმას“ მივყვებით, ჩვენ ამ ომის დასრულებას არაუგვიანეს მომავალი წლისა შევძლებთ. რუსეთი დიპლომატიას მხოლოდ მაშინ მიმართავს, როცა დაინახავს, რომ ძალით ვერაფერს მიაღწევს. ჩვენ ამ ომის დასასრულებლად შესაბამისი პირობები უნდა შევქმნათ“, - აღნიშნა უკრაინის პრეზიდენტმა.

ვოლოდიმირ ზელენსკიმ ევროპელ ლიდერებს „გამარჯვების გეგმის“ თითოეული პუნქტი გააცნო.