ოკუპირებული აფხაზეთის მთელ ტერიტორიაზე, ელექტროენერგიის დეფიციტის გამო, ნოემბრის დასაწყისიდან ოთხსაათიანი შეზღუდვა ამოქმედდება, - ამის შესახებ „ჩერნომორენერგოს“ გენერალურმა დირექტორმა, თემურ ჯინჯოლიამ რუსულ მედიას განუცხადა.

„ამჟამად აფხაზეთის ელექტროენერგიის დეფიციტი 260 მილიონი კვტ/სთ-ს შეადგენს. ამასთან დაკავშირებით „ინტერ-რაო“-სთან მიღწეულია შეთანხმება, რომ 1-ელი ნოემბრიდან დაიწყოს 180 მილიონი კვტ/სთ ელექტროენერგიის მოწოდება რუსეთიდან დეფიციტის როგორმე დაფარვის მიზნით, ნოემბრის დასაწყისიდან ასევე დაწესდება ელექტროენერგიის 4-საათიანი შეზღუდვა რესპუბლიკის მთელ ტერიტორიაზე“, - განაცხადა ჯინჯოლიამ.

„ჩერნომორენერგოს“ გენერალური დირექტორის განმარტებით, ეს არ არის სოციალური ნაკადი და აფხაზეთი მას კომერციულ ფასად შეიძენს.

მისი თქმით, როგორ განვითარდება სიტუაცია, ეს დამოკიდებულია ენგურჰესის კაშხლის წყლის დონეზე, შემოდინებასა და სადგურის შესაძლებლობებზე.