რა შეხვედრები გაიმართა, ვინ იყო მოსული, რა გვითხრა, რა მოგვთხოვა თებერვლის დასაწყისში, თებერვლის ბოლოს, მარტის დასაწყისში, მარტის შუა რიცხვებში და მოგვიანებით, ამაზე არ ვსაუბრობთ - არის რაღაცები, რასაც არ ვამბობთ იმიტომ, რომ ვუფრთხილდებით ურთიერთობებს, - ამის შესახებ საქართველოს პრემიერ-მინისტრმა ირაკლი კობახიძემ განაცხადა.

მან ამასთან დააკონკრეტა, რომ როდესაც საუბარი აქვთ საქართველოს ომში ჩართვისა და ხელისუფლებაში „ნაციონალური მოძრაობის“ დაბრუნების ინტერესზე, გულისხმობენ არა შეერთებულ შტატებსა და ევროკავშირს, არამედ გლობალური ომის პარტიას. თუმცა, პრემიერის განმარტებით, მსგავსი განცხადების გაკეთებისას იმასაც აკონკრეტებენ, რომ გლობალური ომის პარტიას ორივე [აშშ-ისა და ევროკავშირის] მიმართულებით ოფიციალურ ინსტიტუტებზე არსებითი გავლენა აქვთ.

„ძალიან ბევრ რამეს ჩვენ საერთოდ არ ვეხებით და არ ვამბობთ. რა შეხვედრები გაიმართა, ვინ იყო მოსული, რა გვითხრა, რა მოგვთხოვა თებერვლის დასაწყისში, თებერვლის ბოლოს, მარტის დასაწყისში, მარტის შუა რიცხვებში და მოგვიანებით, ამაზე არ ვსაუბრობთ. როდესაც ჩვენ ვსაუბრობთ იმაზე თუ ვის უნდოდა და ვის უნდა საქართველოში ომი, მათ შორის, ვის უნდა კოლექტიური „ნაცმოძრაობის“ დაბრუნება მეორე ფრონტის გასახსნელად, იქ ვაკონკრეტებთ ხოლმე, რომ აქ ვგულისხმობთ არა ამერიკის შეერთებულ შტატებსა და ევროკავშირს, არამედ გლობალური ომის პარტიას, თუმცა იქვე ვაცხადებთ, რომ, სამწუხაროდ, გლობალური ომის პარტიას აქვს არსებითი, პრინციპული გავლენა ოფიციალურ ინსტიტუტებზე როგორც ერთი, ისე მეორე მიმართულებით. ყველაფერს მკაფიოდ ვამბობთ ჩვენ, უბრალოდ არის რაღაცები, რასაც არ ვამბობთ იმიტომ, რომ ვუფრთხილდებით ურთიერთობებს“, - განაცხადა კობახიძემ.