ფოთში მესამე დღეა სტიქიაა, - ამის შესახებ ინფორმაციას ფოთის მერია ავრცელებს.

მათივე ინფორმაციით, მერიის შესაბამისი სამსახურები მუშაობას 24-საათიან რეჟიმში აგრძელებენ. ამ დროის მონაცემებით, ჯამში დატბორილია 200-მდე საცხოვრებელი სახლის პირველი სართული, 50-მდე კერძო საცხოვრებელ სახლს კი ძლიერმა ქარმა სახურავი დაუზიანა.

არსებულ მდგომარეობას ადგილზე გაეცნენ სამეგრელო-ზემო სვანეთის სახელმწიფო რწმუნებულის მოვალეობის შემსრულებელი ნინო ვიბლიანი და ქალაქის მერი ბექა ვაჭარაძე.

როგორც ვაჭარაძემ აღნიშნა, სახლებში, სადაც მიყენებული ზიანის გამო დარჩენა შეუძლებელია, მდგომარეობის გაუმჯობესებამდე მერია მოსახლეობას ქირით გადაყვანას სთავაზობს.

„ფოთში მესამე დღეა სტიქია გვაქვს, რომელმაც მძიმე შედეგები მოიტანა ჩვენი მოსახლეობისთვის. სახლებში, სადაც მიყენებული ზიანის გამო დარჩენა შეუძლებელია, ჩვენ მოსახლეობას ვთავაზობთ ქირით გადაყვანას, მდგომარეობის გაუმჯობესებამდე.

მინდა ვუთხრა ფოთელებს, რომ ჩვენი მხრიდან ყველა შემთხვევას შესაბამისი და ადეკვატური რეაგირება მოჰყვება“, - განაცხადა ფოთის მერმა.

გავრცელებული ინფორმაციის თანახმად, სპეციალური სამუშაო ჯგუფების მიერ მიმდინარეობს ზარალის აღწერა.

„ძლიერი ქარის და წვიმის გამო გამოწვეული სხვადასხვა სახის დაზიანების შემთხვევაში დაუკავშირდით ფოთის მერიის ცხელ ხაზს:

მერის წარმომადგენელი ცენტრის უბანში: 579 75 20 17, 577 397 461;

მერის წარმომადგენელი კუნძულის უბანში: 551 41 11 02, 591 41 7 528;

მერის წარმომადგენელი ნაბადის უბანში: 599 25 41 21, 595 435 250;

მერის წარმომადგენელი მალთაყვის უბანში: 555 57 14 38, 555 292 838“, - ნათქვამია გავრცელებულ ინფორმაციაში.