ის, რაც მარნეულში ხდება, არის სრული კატასტროფა - შევარდნაძის პერიოდის შემდეგ, ასეთი რამ საქართველოში არ მომხდარა და გიორგი კალანდარიშვილს ვულოცავ ასე „წარმატებულად“ არჩევნების ჩატარებას,- ამის შესახებ „ერთიანობა- ნაციონალური მოძრაობის“ ერთ-ერთმა ლიდერმა თამარ კორძაიამ განაცხადა.

მან მოუწოდა შინაგან საქმეთა სამინისტროს დააკავონ ის ადამიანები, რომლებმაც კორძაიას მტკიცებით, „ერთიანობა- ნაციონალური მოძრაობის“ წევრზე აზატ ქარიმოვზე ფიზიკურად იძალადეს.

„მივმართავ საქართველოს შინაგან საქმეთა მინისტრს, რომ დღეს ადგილი აქვს დანაშაულის ფაქტებს საარჩევნო უბნებში. ნაძალადევში მე-9 უბანში ადამიანმა ორჯერ მისცა ხმა და ეს არის სისხლის სამართლის დანაშაული, იგივე მოხდა კრწანისში მე-4 უბანზე. პოლიცია გამოძახებულია 2 საათზე მეტია და კაციშვილი არ მისულა და არ მოუკითხავს კანონდარღვევები. პერსონალურად ბატონი გომელაური იქნება პასუხისმგებელი იმ უმოქმედობაზე, რასაც დღეს პოლიცია სჩადის კანონდარღვევასთან და დანაშაულთან დაკავშირებით. ასევე, პერსონალურად, გიორგი კალანდარიშვილი იქნება პასუხისმგებელი იმ დარღვევებზე, რაც ხდება საქართველოში საარჩევნო უბნებზე. პირველ რიგში, მინდა აღვნიშნო, ის რაც მარნეულში ხდება, არის სრული კატასტროფა - შევარდნაძის პერიოდის შემდეგ ასეთი რამ საქართველოში არ მომხდარა და გიორგი კალანდარიშვილს ვულოცავ ასე „წარმატებულად“ არჩევნების ჩატარებას. შინაგან საქმეთა სამინისტროს ისევ მივმართავ, ჩვენი პარტიის წევრის აზატ ქარიმოვის ცემასთან დაკავშირებით დაუყოვნებლივ დააკავონ მოძალადეები, რომლებმაც ეს სასტიკი დანაშაული ჩაიდინეს“, -განაცხადა კორძაიამ.