პარლამენტის ვიცე-სპიკერის, გია ვოლსკი განცხადებით, თუ პრეზიდენტი სალომე ზურაბიშვილი უარს აცხადებს პროკურატურაში მისვლაზე, პრობლემას არ წარმოადგენს ის, რომ მან სასამართლოს წარმომადგენელთან ერთად მისცეს ჩვენება.

ამის შესახებ ვოლსკიმ ჟურნალისტებს განუცხადა, როდესაც ისაუბრა პრეზიდენტ სალომე ზურაბიშვილის განცხადებაზე, რითაც ის პროკურატურაში გამოკითხვისთვის მისვლაზე უარს აცხადებს.

„არათუ პროკურატურაში უნდა მივიდეს, არამედ მკაცრად და ხისტად უნდა ითხოვდეს პროკურატურისა, თუ უსაფრთხოების სამსახურებისგან საკითხების სასწრაფო გამოძიებას. ეს მხოლოდ იმაზე მიანიშნებს, რომ [გამოძიებასთან] არ თანამშრომლობს, უარს აცხადებს იქ მისვლაზე. ბოლოს და ბოლოს, რა პრობლემაა, თუ ვერ მივა, სასამართლოს წარმომადგენელთან ერთად მისცეს [ჩვენება] ან გამოაქვეყნოს თავისი მასალა ან მიაწოდოს საიდუმლო ფოსტით, იმ შემთხვევაში, თუ ეროვნული უსაფრთხოების საკითხებზეა ლაპარაკი. კონსტიტუციას რომ არღვევს ერთია, მაგრამ ამ თემებზე სამოქალაქო პასუხისმგებლობა მაინც ხომ უნდა გამოიჩინოს. ძალიან მალე იქნება ადგილობრივი არჩევნები და როგორ შეიძლება სახელმწიფო დატოვო, მისი აზრით, თუ მართლაც არსებობს ასეთი ზღაპარი, რასაც თვითონ ჰყვება“, - განაცხადა ვოლსკიმ.

ცნობისთვის, საქართველოს პრეზიდენტი სალომე ზურაბიშვილი, 2024 წლის საპარლამენტო არჩევნების შესაძლო გაყალბებასთან დაკავშირებით გაკეთებული განცხადების გამო პროკურატურაში დაიბარეს, თუმცა როგორც პრეზიდენტმა განაცხადა, საგამოძიებო უწყებაში მისვლას არ აპირებს.