საფრანგეთის თავდაცვის მინისტრი - უკრაინა SCALP-ის და „მისტრალის“ რაკეტებს მიიღებს, უნდა შევინარჩუნოთ დახმარება გრძელვადიან საფუძველზე - საკუთარ უსაფრთხოებაზე პასუხისმგებლობა ევროპელებმა უნდა აიღონ
საფრანგეთის თავდაცვის მინისტრის, სებასტიან ლეკორნუს განცხადებით, ხელი მოაწერა უკრაინისთვის SCALP-ის ათამდე რაკეტის გადაცემას, რომელსაც ქვეყანას საფრანგეთის პრეზიდენტი, ემანუელ მაკრონი დაჰპირდა, - ინფორმაციას უკრაინული მედია ავრცელებს.
მისი თქმით, სამხედრო მხარდაჭერა ძალიან მნიშვნელოვანია და მაშინაც კი, როცა ომი დამთავრდება, ევროპამ უნდა გააგრძელოს უკრაინის არმიის გაძლიერება
„უნდა შევინარჩუნოთ დახმარება გრძელვადიან საფუძველზე, რადგან ეს ასევე საშუალებას მისცემს უკრაინის ხელისუფლებას, განიხილოს პოლიტიკური გადაწყვეტილებები, როდესაც ისინი ამას გადაწყვეტენ. სამხედრო მხარდაჭერა ძალიან მნიშვნელოვანია და მაშინაც კი, როცა ომი დამთავრდება, ჩვენ უნდა გავაგრძელოთ უკრაინის არმიის გაძლიერება. პირველ რიგში, ჩვენ გავაგრძელებთ უპრეცედენტო საწვრთნელ პროგრამას აღმოსავლეთ საფრანგეთში, სადაც 2000 უკრაინელი ჯარისკაცი გადის წვრთნას ბრიგადაში, რომელსაც ფრანგი ჯარისკაცები ხელმძღვანელობენ და ფრანგულ აღჭურვილობას იყენებენ. მეორეც, ჩვენ გავაგრძელებთ მხარდაჭერას. ზამთრის დადგომასთან ერთად, რუსეთის ღრმა შეტევები უკრაინის ტერიტორიაზე, სავარაუდოდ, გაძლიერდება. ჩვენ კვლავ მივაწოდებთ „მისტრალის“ რაკეტებს, კერძოდ, საბრძოლო ზონების დასაცავად“, - განაცხადა მინისტრმა ფრანგულ მედიასთან საუბარში.
მისი თქმით, საკუთარ უსაფრთხოებაზე პასუხისმგებლობა ევროპელებმა უნდა აიღონ.
„მოდით, კიდევ ერთხელ დავფიქრდეთ და ჩვენი თავი ამერიკელების ადგილზე წარმოვიდგინოთ: არიზონას ან ნევადის გადამხდელებმა უნდა დააფინანსონ პოლონელების თუ გერმანელების უსაფრთხოება? ერთიანი გლობალური ორგანიზაციის ფარგლებში და ახალი საფრთხეების ფონზე, ბუნებრივია, რომ საკუთარ უსაფრთხოებაზე პასუხისმგებლობა ევროპელებმა უნდა აიღონ“, - აღნიშნა საფრანგეთის თავდაცვის მინისტრმა.
მისი თქმით, საფრანგეთმა უნიკალური მოდელი შეიმუშავა და ამ მოდელმა ახლა სხვა ევროპული ქვეყნები უნდა შთააგონოს.
v-if="article.gallery" v-html="article.gallery"
