ჩვენი მოქალაქეების უსაფრთხოებისთვის ძლიერი უკრაინა, ძლიერი ევროპა და ძლიერი ალიანსი გვჭირდება, - ამის შესახებ საფრანგეთის პრეზიდენტმა, ემანუელ მაკრონმა პარიზში, ნატო-ს გენერალურ მდივანთან, მარკ რუტესთან ერთად გამართულ ბრიფინგზე განაცხადა.

მაკრონის თქმით, ნატო-მ და მოკავშირეებმა უნდა გააგრძელონ უკრაინის მხარდაჭერა.

„ჩვენ უნდა გავაგრძელოთ იმის მოწოდება, რომ ნატო-მ და მოკავშირეებმა უკრაინის მხარდაჭერა გააგრძელონ, იქამდე, სანამ ეს საჭირო იქნება. ეს მოლაპარაკებებამდე ერთადერთი გზაა. ასევე, მინდა ხაზგასმით აღვნიშნო, რომ უკრაინის შესახებ უკრაინელების გარეშე და ევროპის შესახებ ევროპელების გარეშე არაფერი უნდა გადაწყდეს. ჩვენი მოქალაქეების უსაფრთხოებისთვის ძლიერი უკრაინა, ძლიერი ევროპა და ძლიერი ალიანსი გვჭირდება“, - განაცხადა ემანუელ მაკრონმა.

მისივე თქმით, ომში რუსეთის მხარეს ჩრდილოეთ კორეელი ჯარისკაცების ჩართვა სერიოზულ ესკალაციას წარმოადგენს.