დღეს საღამოს 20:00 საათიდან 24 საათის განმავლობაში თბილისის ეს ტერიტორია [თსუ-ის უნივერსიტეტის მიმდებარედ] გადაიკეტება - ქუჩა ყველაზე დემოკრატიული ინსტრუმენტი და მექანიზმია და სხვა მექანიზმებთან ერთად ქართული საზოგადოება და ოპოზიციური პარტიები ქუჩას დემოკრატიისთვის გამოვიყენებთ, - ამის შესახებ „კოალიცია ცვლილებისთვის“ ლიდერმა, ნიკა მელიამ თსუ-სთან სიტყვით გამოსვლისას განაცხადა.

მისი თქმით, შემდგომი განცხადებები მოგვიანებით გაკეთდება.

„დღეს საღამოს 20:00 საათიდან 24 საათის განმავლობაში თბილისის ეს ტერიტორია [თსუ-ის უნივერსიტეტის მიმდებარედ] გადაიკეტება. ჩვენ გადავდივართ იმ ეტაპზე, რასაც ჩვენი წარსული, აწმყო და მომავალი განაგებს. არალეგიტიმურ ხელისუფლებას ხალხი არ აღიარებს. არალეგიტიმურ ხელისუფლებას არ აღიარებს არავინ მსოფლიოში. მაშასადამე, პირველ რიგში ჩვენ - პოლიტიკური პარტიები, რომლებსაც ნდობის მოდული მოგვანიჭა ქართველმა ხალხმა, მაგრამ სისტემური გაყალბებით ხელისუფლებამ თვითმარქვიად გამოაცხადა საკუთარი თავი, ვმოქმედებთ დღეიდან მხოლოდ და მხოლოდ ადეკვატურად. 24 საათის განმავლობაში, ხვალ საღამოს 8 საათამდე თბილისის ერთ-ერთ ყველაზე ცენტრალურ ადგილას ვრჩებით. შემდგომი განცხადებები მოგვიანებით გაკეთდება.

ბრძოლა ბოლომდე გაგრძელდება! არავის ეგონოს, რომ ბრძოლა შენელდება, ეს ბრძოლა დასრულდება ერთადერთი გამოსავლით - ახალი არჩევნებით. ქუჩა ყველაზე დემოკრატიული ინსტრუმენტი და მექანიზმია და სხვა მექანიზმებთან ერთად ქართული საზოგადოება და ოპოზიციური პარტიები ქუჩას დემოკრატიისთვის გამოვიყენებთ. ჩვენი ხმა არჩევნების შედეგებში არ აისახა იმიტომ, რომ გააყალბეს, მაგრამ ჩვენი ხმა თბილისის ქუჩებიდან აისახება იმ შედეგზე, რომელიც ახალი არჩევნებით დასრულდება“, - განაცხადა მელიამ.