მსოფლიო ახალ პერიოდში შევიდა, რომელიც ტურბულენტობითა და ტრანსფორმაციით აღინიშნება, - ამის შესახებ ჩინეთის პრეზიდენტმა, სი ძინპინმა დიდი ბრიტანეთის პრემიერ-მინისტრს, კირ სტარმერს ბრაზილიაში, „დიდი ოცეულის“ სამიტის ფარგლებში გამართულ შეხვედრაზე განუცხადა.

„როგორც გაერო-ს უშიშროების საბჭოს მუდმივ წევრებსა და მსოფლიოს უმსხვილეს ეკონომიკებს, ჩინეთსა და დიდ ბრიტანეთს, ეროვნული განვითარების ხელშეწყობისა და გლობალური გამოწვევების გადაჭრის მიზნით, ორმაგი პასუხისმგებლობა ეკისრებათ“, - განაცხადა ჩინეთის პრეზიდენტმა.

დიდი ბრიტანეთის პრემიერ-მინისტრმა აღნიშნა, რომ სურს, ჩინეთსა და დიდ ბრიტანეთს შორის ურთიერთობები თანმიმდევრული იყოს.

„დიდ ბრიტანეთსა და ჩინეთს შორის ძლიერი ურთიერთობა მნიშვნელოვანია, როგორც ჩვენი ქვეყნებისთვის, ასევე საერთაშორისო საზოგადოებისთვის. დიდი ბრიტანეთი კანონის უზენაესობის მიმართ ერთგული პროგნოზირებადი, თანმიმდევრული და სუვერენული აქტორი იქნება“, - აღნიშნა კირ სტარმერმა.