საქართველოს სახალხო დამცველი, ლევან იოსელიანი საოკუპაციო ხაზის გასწვრივ მცხოვრებთა მდგომარეობის გასაცნობად შიდა ქართლში გაემგზავრა და სოფელების: დიცისა და ქორდის მოსახლეობასთან შეხვედრები გამართა. აღნიშნულთან დაკავშირებით ინფორმაციას ომბუდსმენის აპარატი ავრცელებს.

მათი ცნობით, შეხვედრებზე მოსახლეობა ძირითადად, უსაფრთხოებისა და ინფრასტრუქტურის პრობლემებზე საუბრობდა. ამასთან, მოსახლეობამ აღნიშნა, რომ სხვა პრობლემებთან ერთად, სოფლებში შიდა გზები მოუწესრიგებელია, სარწყავი წყლის არხები განსაახლებელია, აფთიაქი არ არის და არც საზოგადოებრივი ცენტრები ფუნქციონირებენ. შედეგად, მაღალია ახალგაზრდების მიგრაცია, რაც ტერიტორიების მოსახლეობისგან დაცლას იწვევს.

„ვაგრძელებ საოკუპაციო ხაზის მიმდებარე სოფლების სტუმრობას და აქ მცხოვრებ მოსახლეობასთან შეხვედრას. ჩემთვის ძალიან მნიშვნელოვანია იმ ადამიანთა მდგომარეობის გაცნობა და მათ გვერდით დგომა, რომლებიც მუდმივად დგანან სხვადასხვა ტიპის, მათ შორის უსაფრთხოების პრობლემების წინაშე.

ახლახან, ორი ადამიანი უკანონოდ დააკავეს. ვფიქრობ, აუცილებელია, რომ სახელმწიფომ განსაკუთრებული მზრუნველობა გამოიჩინოს ასეთ საფრთხის შემცველ გარემოში მცხოვრებთა მიმართ. ამიტომ ჩამოვდივარ, ვხვდები მათ და უშუალოდ ვეცნობი მათ მდგომარეობას.

ყოველი შეხვედრა გვაძლევს საშუალებას, ზედმიწევნით გამოვკვეთოთ არსებული პრობლემები, ადამიანის უფლებადარღვევის სახეები და დავინახოთ მათი გამოსწორების საშუალებები. მუდმივი მონიტორინგი გვეხმარება დასკვნების გაკეთებაში, რასაც შემდგომში შესაბამის პასუხისმგებელ სახელმწიფო სტრუქტურებს ვაწვდით და ასევე ავსახავთ ჩვენს წლიურ თუ სპეციალურ ანგარიშებში“, - განაცხადა სახალხო დამცველმა.