რუსეთის საჰაერო თავდაცვის ძალებმა, გასული დღე-ღამის განმავლობაში რვა ბალისტიკური რაკეტა ჩამოაგდეს, - ინფორმაციას რუსული მედია ქვეყნის თავდაცვის სამინისტროზე დაყრდნობით ავრცელებს.

„საჰაერო თავდაცვის საშუალებებმა ჩამოაგდო რვა ბალისტიკური რაკეტა, ექვსი ამერიკული წარმოების JDAM-ის ტიპის მართვადი საჰაერო ბომბი და 45 თვითმფრინავის ტიპის უპილოტო საფრენი აპარატი“, - აცხადებენ უწყებაში.

გარდა ამისა, რუსეთის თავდაცვის სამინისტროს მტკიცებით, ოპერატიულ-ტაქტიკურმა ავიაციამ, დრონებმა, სარაკეტო ძალებმა და არტილერიამ დაარტყა სამხედრო აეროდრომებს, ენერგეტიკულ ობიექტებს, რომლებიც მხარს უჭერენ უკრაინის სამხედრო-სამრეწველო კომპლექსის საწარმოებს და უკრაინის შეიარაღებული ძალების ცოცხალი ძალისა და ტექნიკის თავმოყრის 130-ზე მეტ ადგილს.