თინა ბოკუჩავა „ქართულ ოცნებაზე“ - არანაირი გზა, მშვიდობით და ღირსებით ევროპისკენ, არ ჰქონდათ, მათი გზა ყოველთვის იყო, უღირსად და მონობით რუსეთისკენ - რას ვაკეთებთ ჩვენ? ან ვიბრძვით ან ვბარდებით რუსეთს
არანაირი გზა მშვიდობით და ღირსებით ევროპისკენ მათ არ ჰქონდათ. მათი გზა ყოველთვის იყო უღირსად და მონობით რუსეთისკენ, - ამის შესახებ „ნაციონალური მოძრაობის“ თავმჯდომარე, თინა ბოკუჩავა სოციალურ ქსელში წერს, რითაც ეხმაურება პრემიერ-მინისტრის ირაკლი კობახიძის განცხადებას იმის შესახებ, რომ 2028 წლის ბოლომდე დღის წესრიგში არ დადგება ევროკავშირთან მოლაპარაკებების გახსნის საკითხი.
თინა ბოკუჩავას განცხადებით, „ქართულმა ოცნებამ“ საქართველოს მოქალაქეები მორიგ ჯერზე მოატყუა.
„ქართულ ოცნებად“ წოდებულმა რუსულმა კოშმარმა იცოდა, რომ ევროპარლამენტის უმძიმესი რეზოლიციის შემდეგ, ჩამოვიდოდა ევროკავშირის მისია, რომელიც გამოავლენდა, რომ 26 ოქტომბერს მათ ჩაატარეს რუსული სპეცოპერაცია ქართველი ხალხის წინააღმდეგ.
ამიტომ დაასწრეს ამ გადაწყვეტილებას და თავად გაწყვიტეს ევროკავშირთან გაწევრიანების პროცესი.
რას ვაკეთებთ ჩვენ? ან ვიბრძვით ან ვბარდებით რუსეთს - არჩევანი ჩვენია”, - წერს თინა ბოკუჩავა.
საქართველოს პრემიერ-მინისტრმა ირაკლი კობახიძემ საპარლამენტო უმრავლესობისა და სამთავრობო გუნდის შეხვედრის შემდეგ ევროკავშირთან მოლაპარაკებების საკითხზე განცხადება გააკეთა.
კერძოდ, მმართველი გუნდის გადაწყვეტილებით, საქართველო 2028 წლის ბოლომდე დღის წესრიგში არ დააყენებს ევროკავშირთან მოლაპარაკების გახსნის საკითხს. პრემიერ-მინისტრის განცხადებით, საქართველო, ასევე, 2028 წლის ბოლომდე უარს ამბობს ყოველგვარ საბიუჯეტო გრანტზე ევროკავშირის მხრიდან.
