პოლიციელები ცდილობენ გაათავისუფლონ რუსთაველის გამზირის მიმდებარე ქუჩები, ასევე, ქაშვეთის ტაძრის მიმდებარე ტერიტორიიდან გამოიყვანონ აქციის მონაწილეები და გაასუფთაონ ქაშვეთის შიდა და გარე ტერიტორია.

საპოლიციო ძალები ასევე ცდილობენ, გაათავისუფლონ ჯორჯაძის ქუჩა. ამ წუთებში მათ სრულად უკავიათ რუსთაველის გამზირი, ჭიჭინაძისა და ჩიტაძის ქუჩები.

აქციის მონაწილეებმა ალექსანდროვის ბაღში გადაინაცვლეს.

შეგახსენებთ, პარლამენტთან აქცია მას შემდეგ ჩაინიშნა, რაც საქართველოს პრემიერ-მინისტრმა ირაკლი კობახიძემ საპარლამენტო უმრავლესობისა და სამთავრობო გუნდის შეხვედრის შემდეგ ევროკავშირთან მოლაპარაკებების საკითხზე განცხადება გააკეთა. კერძოდ, მმართველი გუნდის გადაწყვეტილებით, საქართველო 2028 წლის ბოლომდე დღის წესრიგში არ დააყენებს ევროკავშირთან მოლაპარაკების გახსნის საკითხს. პრემიერ-მინისტრის განცხადებით, საქართველო, ასევე, 2028 წლის ბოლომდე უარს ამბობს ყოველგვარ საბიუჯეტო გრანტზე ევროკავშირის მხრიდან.