თუ ჩვენ ომის ცხელი ეტაპის შეჩერება გვსურს, მაშინ უკრაინის ტერიტორია, რომელსაც ჩვენ ვაკონტროლებთ, ნატო-ს ქოლგის ქვეშ უნდა მივიღოთ, - ამის შესახებ უკრაინის პრეზიდენტმა, ვოლოდიმირ ზელენსკიმ Sky News-თან ინტერვიუში განაცხადა.

„თუ ჩვენ ომის ცხელი ეტაპის შეჩერება გვსურს, მაშინ უკრაინის ტერიტორია, რომელსაც ჩვენ ვაკონტროლებთ, ნატო-ს ქოლგის ქვეშ უნდა მივიღოთ. ეს სწრაფად უნდა გავაკეთოთ. შემდეგ კი, უკრაინის (ოკუპირებულ) ტერიტორიასთან დაკავშირებით, უკრაინა მათ დაბრუნებას დიპლომატიური გზით შეძლებს“, - განაცხადა ვოლოდიმირ ზელენსკიმ.

უკრაინის პრეზიდენტის თქმით, ზემოთ აღნიშნული პირობის შემთხვევაში ნატო-ში გაწევრიანების შესახებ მიწვევა უკრაინის საერთაშორისოდ აღიარებულ საზღვრებს უნდა აღიარებდეს.

ამასთან, უკრაინის პრეზიდენტმა აღნიშნა, რომ ცეცხლის შეწყვეტა საჭიროა იმის გარანტირებისთვის, რომ უკრაინის კიდევ უფრო მეტი ტერიტორიის დასაკავებლად „პუტინი უკან არ დაბრუნდეს“.

ასევე, მისივე თქმით, ნატო-მ უკრაინის მიერ კონტროლირებადი ტერიტორია „დაუყოვნებლივ“ უნდა დაფაროს, „წინააღმდეგ შემთხვევაში ის უკან დაბრუნდება“.