კატეგორიულად მიუღებელია ძალადობრივი ქმედებები, რომლებიც განხორციელდა აქციებზე დაკავებულ პირებზე, როგორც დაკავების პროცესში, ასევე შემდგომ. დაკავების ის ფორმები, რაც იყო გამოყენებული მომიტინგეთა მიმართ, სცდება ყოველგვარ სტანდარტს - ამის შესახებ პარტია „ევროპელი დემოკრატების“ თავმჯდომარემ პაატა დავითაიამ განაცხადა.

დავითაია 29-30 ნოემბრის აქციებზე განვითარებულ მოვლენებს ეხმაურება.

„არ შემიძლია არ გამოვეხმაურო, რომ დაკავებულთა შორის არის ცნობილი პოეტი და ქართული ენის მასწავლებელი, თორნიკე ჭელიძე. ის ეროვნულ ღირებულებებს ასწავლიდა მოსწავლეებს, რომელთა შორის ჩემი შვილიცაა. თორნიკე ჭელიძის დაკავება არის რთული პროცესი მისი მოსწავლეებისთვის. ტრავმა, რომელსაც ამგვარი ძალადობრივი ქმედებებით იღებს მომავალი თაობა არის ძალიან მძიმე და მტკივნეული.

მოვუწოდებ სამართალდამცავ ორგანოებს, სასწრაფოდ განთავისუფლდნენ უკანონოდ დაკავებული ადამიანები, მათ შორის ბატონი ჭელიძე. ეს ადამიანები იცავდნენ საქართველოს კონსტიტუციას და ქვეყნის ევროპულ კურსს. მშვიდობიან მომიტინგეებთან გადამეტებული ძალის გამოყენება შეიცავს სისხლის სამართლის დანაშაულის ნიშნებს, დაუსჯელი არ უნდა დარჩეს არავინ, ვინც ეს დანაშაულები ჩაიდინა“, - აცხადებს პაატა დავითაია, რომლის კომენტარსაც „ევროპელი დემოკრატები“ ავრცელებს.