პირველ არხთან საპროტესტო აქცია დასრულდა.

აქციის მონაწილეები საზოგადოებრივი მაუწყებლის შენობასთან რამდენიმე საათის წინ მივიდნენ და არხის ხელმძღვანელობასთან შეხვედრა მოითხოვეს.

მათი მოთხოვნები იყო, პირველ არხს თბილისში მიმდინარე პროტესტის მონაწილეებისთვის დაეთმო საეთერო დრო, რაც არხის მენეჯმენტმა დააკმაყოფილა. ასევე, მათი მოთხოვნაა, გადადგეს პირველი არხის ხელმძღვანელი პირები - თინათინ ბერძენიშვილი და ვასილ მაღლაფერიძე.

აქციის მონაწილეების თქმით, პირველ არხს მთავრობა პროპაგანდისთვის იყენებს და საზოგადოების კრიტიკულ ხმას ახშობს.

თავის მხრივ, არხის დირექტორმა თინათინ ბერძენიშვილმა, რომელიც აქციის მონაწილეებთან პირადად ჩავიდა, მათი ერთ-ერთი მოთხოვნა დააკმაყოფილა და აქციის რამდენიმე მონაწილე პირდაპირ ეთერში, გადაცემაში მიიწვია.

„ყოველ დღე მანამ, სანამ ვასილ მაღლაფერიძე, ეს „კაგებეშნიკი“ არ გადადგება, აქ ვიქნებით. რეგიონებში მაუწყებლობის გამორთვა, ამათი ტრადიციაა - ხმის ჩახშობა. მანიფესტაციით მოვედით, საზოგადოებას ჩვენი ხმა უნდა გაეგოთ. სანამ მანიფესტაციით არ მოვედით, მანამდე ეთერში არ შეგვიშვეს. არამზადა ვასილ მაღლაფერიძე „რობოკოპივით“ ჩამოგვიდგა. ქართველი ხალხის ხმა უნდა გაისმას“, - განაცხადა ლაშა ბუღაძემ.

აქციის მონაწილეების შეფასებით, ისინი პირველ არხთან აქციას ყოველდღიურად გამართავენ, სანამ არხის დირექცია დაკავებულ თანამდებობას არ დატოვებს.