ოზურგეთში მოქალაქეები საპროტესტო აქციას მართავენ

ოზურგეთში მოქალაქეები საპროტესტო აქციას მართავენ. ისინი თავდაპირველად თეატრის შენობასთან შეიკრიბნენ. მოგვიანებით დემონსტრანტებმა ქალაქის ცენტრალურ ქუჩებში ფეხით მსვლელობა მოაწყვეს შეძახილებით „საქართველო, საქართველო“ და მოსახლეობას აქციაში მონაწილეობისკენ მოუწოდებდნენ. აქციის მონაწილეებს გაშლილი აქვთ საქართველოსა და ევროკავშირის დროშები. როგორც ისინი აცხადებენ, ერთობით აუცილებლად დაამარცხებენ რუსულ რეჟიმს.

„ცხადია, ჩვენ ვაპროტესტებთ გაყალბებულ არჩევნებს, მიტაცებულ ხელისუფლებას, ვაპროტესტებთ ამ მავნებლების და კუნთიანი „ზონდერების“ მიერ ადამიანების უმოწყალო, სასიკვდილოდ ცემას“, - განაცხადა აქციის ერთ-ერთმა მონაწილემ, კუკა ბარამიძემ.

ამ წუთებში კი, აქცია სახელმწიფო რწმუნებულის ადმინისტრაციის შენობასთან გრძელდება.