ხელისუფლება რაღაც ტიპის შიშის დათესვას ცდილობს, თვითონ არის ეიფორიაში, ვერ წარმოუდგენია, როგორ შეიძლება განვითარდეს პროცესები, - ამის შესახებ პარტია „გახარია საქართველოსთვის“ ერთ-ერთმა ლიდერმა ბერდია სიჭინავამ პოლიტიკოსებისა და აქტივისტების დაკავებასთან დაკავშირებით განაცხადა.

როგორც ის აღნიშნავს, ქვეყანას ევროპული კურსი უკვე არჩეული აქვს და ამას ვერავინ გადაახვევინებს.

„როცა არსენალში არ გაქვს პოლიტიკური ტყვიები გამოიყენო იმისთვის, რომ შენი პოლიტიკური პოზიციები დაიცვა, მიმართავ ასეთ ფორმას - ძალადობას, მოქალაქეების ცემას, პოლიტიკური ლიდერების დაკავებას, ოფისებში რეიდების ჩატარებას, რაც ამ ხელისუფლების დასასრულია. ამ ქვეყანას თავისი ევროპული გზა უკვე არჩეული აქვს და ამ გზის ბარიერი ვერ იქნება ვერც ივანიშვილი და ვერც მისი თოჯინების თეატრი“, - განაცხადა სიჭინავამ.

ის ასევე გამოეხმაურა საკონსტიტუციო სასამართლოს გადაწყვეტილებას, რომლის მიხედვითაც, სასამართლომ პრეზიდენტისა და პოლიტიკური პარტიების სარჩელები 26 ოქტომბრის არჩევნების არაკონსტიტუციურად ცნობაზე წარმოებაში არ მიიღო.

„საკონსტიტუციო სასამართლოს მოლოდინი, რომ პოზიტიური იქნებოდა და ამ ქვეყანაში ჩატარებულ არჩევნებს თავის სახელს დაარქმევდა, რა თქმა უნდა, არავის არ ჰქონია. მადლობა იმ მოსამართლეებს, რომლებმაც განსხვავებული მოსაზრებები დააფიქსირეს საკონსტიტუციო სარჩელებთან დაკავშირებით. ყველა ინსტიტუტი მიტაცებული აქვს ერთ ადამიანს, ჯიბეში უდევს. შესაბამისად, საკონსტიტუციო სასამართლოსგან, განსაკუთრებული მოლოდინი არ გვქონია. ყველა სისტემის მხილება უნდა მოხდეს, რომელიც ერთი ადამიანის სამსახურშია ჩამდგარი“, - განაცხადა სიჭინავამ.