ირაკლი კობახიძე ჟურნალისტს - რომ არ იძალადოთ, საერთოდ არ იქნება არც მხუთავი გაზი და არც წყალი

ახლა გაგაძევებთ, ნუ ტლიკინებ იცოდე, გაგაძევებ, თუ ტლიკინს გააგრძელებ. „ნაცი“ რომ ხარ, ტლიკინის უფლება არ გაქვს, მიუხედავად იმისა, რომ კოლეგებმა ამას მიგაჩვიეს. სირცხვილია, - ასე მიმართა პრემიერ-მინისტრმა, ირაკლი კობახიძემ Bm.ge-ს ჟურნალისტ თელარა გელანტიას მას შემდეგ, რაც მან მიმდინარე მოვლენებთან დაკავშირებით პრემიერს კითხვა დაუსვა.

„რომ არ იძალადოთ, საერთოდ არ იქნება არც მხუთავი გაზი და არც წყალი. ჭიჭინაძის ქუჩაზე სპეცრაზმს მიადგნენ, აგინებდნენ უშვერი სიტყვებით და ესროდნენ ქვებს და შუშის ბოთლებს. ამან გამოიწვია წყლის და გაზის გამოყენება. თქვენი პარტია აკეთებდა ამას. თუ არ დაესხმებით თავს პარლამენტის შენობას, შსს-ს, არაფერი იქნება“, - მიმართა კობახიძემ ჟურნალისტს.

პრემიერის განმარტებით, აქციაზე წყლის ჭავლი და აირი იმისთვის გამოიყენება, რომ შეკრება დაიშალოს.

„არავინ მოკვდება. მაგალითად, გერმანიაში აკრძალულია შეკრების მონაწილეების მიერ სახის დაფარვა იმიტომ, რომ როდესაც შეკრებაზე ნიღბით მიდიხარ, ამით სერიოზულ რისკებს აჩენ, რადგან ძალიან უჭირს მერე შსს-ს რეაგირება და მოძალადეების იდენტიფიცირება. აპრიორი ითვლება, რომ თუ სახე გაქვს დაფარული და ასე მიდიხარ შეკრებაზე, ე.ი. წინასწარვე ემზადები ძალადობისთვის“, - განაცხადა კობახიძემ.

გარდა ამისა, პრემიერმა გუშინ „ტელეკომპანია პირველის“ ჟურნალისტსა და ოპერატორზე განხორციელებულ თავდასხმაზე კითხვასაც უპასუხა.

„სასიკვდილოდ გაწირეს? რატომ უტრირებ ახლა? სასიკვდილოდ თუ ვინმე გაწირეს, იყო „საზოგადოებრივი მაუწყებლის“ ოპერატორი, რომელსაც თქვენმა თანაპარტიელმა, „ორკმა“ სახეში პიროტექნიკა დამიზნებით ესროლა და არც ერთხელ დაგიგმიათ ეს ფაქტი. სირცხვილია. რატომ, იცი? იმიტომ, რომ „ნაცი“ ხარ და „ნაცები“ ხართ თავიდან ბოლომდე თქვენი ტელევიზია“,- მიმართა კობახიძემ ჟურნალისტს.