სამხრეთ კორეის პრეზიდენტს ქვეყნიდან გასვლა აეკრძალა
სამხრეთ კორეის პრეზიდენტს, იუნ სუკ იოლს ქვეყნიდან გასვლა აეკრძალა, რადგან ოპოზიციონერმა პოლიტიკოსებმა მისი პარტია სახელმწიფო გადატრიალების მეორე მცდელობაში დაადანაშაულეს მას შემდეგ, რაც პარტიამ პრეზიდენტის იმპიჩმენტზე უარი განაცხადა. ინფორმაციას The Guardian-ი ავრცელებს.
„ეს არის აჯანყებისა და გადატრიალების მეორე უკანონო, არაკონსტიტუციური აქტი“, - განაცხადა ოპოზიციური „დემოკრატიული პარტიის“ ლიდერმა, პარკ ჩან-დემ.
იუსტიციის სამინისტროს საიმიგრაციო სამსახურის კომისარმა, ბაე სანგ-აპმა საპარლამენტო მოსმენაზე დაადასტურა, რომ იუნ სუკ იოლს სამოგზაურო აკრძალვა დაეკისრა.
შეგახსენებთ, სამხრეთ კორეის პრეზიდენტმა, იუნ სუკ იოლმა გასული კვირის დასაწყისში ქვეყანაში საომარი მდგომარეობა გამოაცხადა და მიზეზად „კონსტიტუციური წესრიგისა და თავისუფალი სამხრეთ კორეის ჩრდილოეთ კორეის კომუნისტური ძალების საფრთხისგან დაცვა“ დაასახელა. საომარი მდგომარეობის გამოცხადების შემდეგ საკანონმდებლო ორგანოს შესასვლელი პოლიციამ დაბლოკა, სამართალდამცველებსა და დემონსტრანტებს შორის შეტაკება მოხდა. მთავრობამ რამდენიმე საათის შემდეგ საომარი მდგომარეობა გააუქმა. ქვეყნის ოპოზიციურმა პარტიებმა პრეზიდენტის წინააღმდეგ იმპიჩმენტის პროცედურა დაიწყეს, თუმცა პარლამენტში პრეზიდენტის იმპიჩმენტის საკითხზე კენჭისყრა ჩავარდა, რადგან მმართველმა პარტიამ კენჭისყრას ბოიკოტი გამოუცხადა. პარლამენტში იმპიჩმენტის საკითხზე კენჭისყრამდე რამდენიმე საათით ადრე სამხრეთ კორეის პრეზიდენტმა საგანგებო მდგომარეობის გამოცხადების გამო ბოდიში მოიხადა და პირობა დადო, რომ საომარი მდგომარეობის გამოცხადების მეორე მცდელობა აღარ იქნება.
