პარლამენტმა 2025 წლის სახელმწიფო ბიუჯეტი დაამტკიცა - დოკუმენტი 88 ხმით, ერთხმად მიიღეს

პარლამენტმა 2025 წლის სახელმწიფო ბიუჯეტი დაამტკიცა - მომავალი წლის მთავარი ფინანსური დოკუმენტი 88-ხმით, ერთხმად მიიღეს.

ბიუჯეტის პროექტი, თანდართულ მასალებთან ერთად, პლენარულ სხდომაზე ფინანსთა მინისტრმა ლაშა ხუციშვილმა წარადგინა.

2025 წლის ბიუჯეტი დაგეგმილია შემდეგი მაკროეკონომიკური პარამეტრების მიხედვით: რეალური ეკონომიკური ზრდა დაგეგმილია 6,0%-ის ოდენობით, ხოლო საშუალოვადიან პერიოდში რეალური ეკონომიკური ზრდის პროგნოზი 5,2%-ს შეადგენს.

მშპ-ის დეფლატორის პროგნოზი 3%-ია - იგივე მაჩვენებელი შენარჩუნებულია მომდევნო წლებშიც.

საშუალო ინფლაციის პროგნოზი მიმდინარე წელს მიზნობრივ მაჩვენებელზე მნიშვნელოვნად ნაკლებია და 1.0%-ს შეადგენს, ხოლო საშუალოვადიან პერიოდში მიზნობრივი მაჩვენებლის ფარგლებშია (3%).

სახელმწიფო ბიუჯეტის ასიგნებების მოცულობა, ბიუჯეტის წინა წარდგენასთან შედარებით 895,2 მლნ ლარით იზრდება და 27 941,7 მლნ ლარს შეადგენს.

რაც შეეხება სამინისტროებისთვის გამოყოფილ დაფინანსებას, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ასიგნებები 8 820,0 მლნ ლარით განისაზღვრა, რაც 2024 წლის დამტკიცებულ გეგმასთან შედარებით გაზრდილია 990.9 მლნ ლარით.

განათლების, მეცნიერების და ახალგაზრდობის სამინისტროს დაფინანსება 3 085,0 მლნ ლარით განისაზღვრა, რაც 2024 წლის დამტკიცებულ ასიგნებას 577,0 მლნ ლარით აღემატება.

კულტურის სამინისტროს დაფინანსება განისაზღვრა 297,6 მლნ ლარით, ხოლო სპორტის სამინისტროს დაფინანსება 298,4 მლნ ლარი იქნება.

რეგიონული განვითარებისა და ინფრასტრუქტურის სამინისტროს დაფინანსება განისაზღვრა 3 125,0 მლნ ლარით, მათ შორის საბიუჯეტო სახსრების ნაწილში გათვალისწინებულია 2 405,8 მლნ ლარი, გრანტებში 18,5 მლნ ლარი, ხოლო კრედიტების ნაწილში - 700,8 მლნ ლარი.

გარემოს დაცვისა და სოფლის მეურნეობის სამინისტროს დაფინანსება 808.1 მლნ ლარს შეადგენს. ეკონომიკისა და მდგრადი განვითარების სამინისტროსათვის გათვალისწინებულია 947,0 მლნ ლარი, რაც 2024 წლის მაჩვენებელს 146,0 მლნ ლარით აღემატება.

ფინანსთა სამინისტროს დაფინანსება 121,0 მლნ ლარს შეადგენს. იუსტიციის სამინისტროსთვის გათვალისწინებულია 442,0 მლნ ლარი, საგარეო საქმეთა სამინისტროსთვის - 215,0 მლნ ლარი, თავდაცვის სამინისტროსთვის - 1 730,0 მლნ ლარი, რაც 2024 წლის დამტკიცებულ გეგმას 350,0 მლნ ლარით აღემატება.

შინაგან საქმეთა სამინისტროსთვის გათვალისწინებულია 1 395,0 მლნ ლარი, რაც 2024 წლის დამტკიცებულ გეგმას 135,0 მლნ ლარით აღემატება. აღნიშნულ თანხაში გათვალისწინებულია პოლიციელთა ხელფასების 10%-იანი ზრდა.