თბილისის მერიაში არ ადასტურებენ გავრცელებულ ინფორმაციას, რომ ქონების მართვის სააგენტოს უფროსი მარიამ კვერნაძე თანამდებობიდან წავიდა.

აღნიშნულის შესახებ „ინტერპრესნიუსს“ მერიაში განუცხადეს.

„არ ვადასტურებთ გავრცელებულ ინფორმაციას. ყველა სამთავრობო ცვლილებაზე მერი თავად აკეთებს განცხადებას. თუ რამე ცვლილება გვექნება, აუცილებლად გახდება ცნობილი საზოგადოებისთვის“, - განაცხადეს მერიაში.

ცნობისთვის, სოციალურ ქსელში ვრცელდება ინფორმაცია, რომ თბილისის ქონების მართვის სააგენტოს 27 ნოემბერს დანიშნული უფროსი მარიამ კვერნაძე თანამდებობიდან წავიდა.

ოპოზიციონერი პოლიტიკოსი ირაკლი აბესაძე „ფეისბუკში“ წერს, რომ „კალაძე უკმაყოფილოა მერიის თანამშრომლების აქტიურობით ე.წ. ხელისუფლების უკანონო ქმედებების წინააღმდეგ და მათ შორის, ამ სააგენტოში წმენდა მოითხოვა“.

„თბილისის მერიის სისტემაში 30 ათასამდე თანამშრომელია, მათგან მნიშვნელოვანი ნაწილი ისეთ ფუნქციებს ასრულებს, ვისი გაშვებაც უბრალოდ პარალიზებას გამოიწვევს ქალაქის. დანარჩენი ე.წ. პარტიულ/ნეპოტისტური ბალასტი არც საქმეს აკეთებს და არც ხმის ამომღებია. ამიტომ მეტი სოლიდარობა ერთმანეთში, ვინც რეალურად მუშაობთ და კალაძე იძულებული იქნება თქვენი ხმა მოისმინოს, სხვა შემთხვევაში ასე ძალადობრივად ეცდება სისტემის გაწმენდას არაპარტიულად მორჩილი ხალხისგან.

თბილისის მერია, გააკეთეთ განმარტება რა ხდება მერიის სისტემაში”, - წერს სოციალურ ქსელში ოპოზიციონერი პოლიტიკოსი ირაკლი აბესაძე.