WSJ - დონალდ ტრამპმა საფრანგეთის და უკრაინის ლიდერებს განუცხადა, რომ სურს, ევროპულმა ჯარებმა უკრაინაში ცეცხლის შეწყვეტის რეჟიმი გააკონტროლონ
აშშ-ის არჩეულმა პრეზიდენტმა, დონალდ ტრამპმა ევროპის ქვეყნებს შესთავაზა, ცეცხლის შეწყვეტის რეჟიმის დაცვის მონიტორინგისთვის თავიანთი ჯარები უკრაინის ტერიტორიაზე განათავსონ, - ინფორმაციას The Wall Street Journal-ი ავრცელებს.
გამოცემის წყაროების თქმით, ეს ინიციატივა 7 დეკემბერს პარიზში უკრაინის პრეზიდენტ ვოლოდიმირ ზელენსკისა და საფრანგეთის პრეზიდენტ ემანუელ მაკრონთან შეხვედრისას გახდა ცნობილი.
The Wall Street Journal-ის ინფორმაციით, ტრამპმა ზელენსკის და მაკრონს განუცხადა, რომ ის არ უჭერს მხარს უკრაინის ნატო-ში გაწევრიანებას, მაგრამ სურს, უკრაინა იყოს ძლიერი და კარგად შეიარაღებული ომის დასრულების შემდეგ.
ტრამპის განცხადებით, ევროპამ მთავარი როლი უნდა შეასრულოს უკრაინის დაცვასა და მხარდაჭერაში. აშშ-ის არჩეული პრეზიდენტის გეგმის მიხედვით, ამერიკელი სამხედროები უშუალოდ არ ჩაერთვებიან მისიაში, თუმცა მან არ გამორიცხა აშშ-ის მხრიდან რაიმე სახის მხარდაჭერა ევროპული კონტინგენტის მიმართ.
The Wall Street Journal-ის თქმით, ევროპული ჯარები უკრაინაში, შესაძლოა, სპეციალური სამშვიდობო მისიის ფარგლებში განლაგდნენ, რომელიც არ იქნება ნატო-ს ოპერაცია. თუმცა, როგორც გამოცემა აღნიშნავს, რუსეთის პრეზიდენტი ვლადიმერ პუტინი მიიჩნევს, რომ „ომს იგებს“ და სავარაუდოდ მტკიცე წინააღმდეგობას გაუწევს მისი დასრულების ნებისმიერ მცდელობას.
v-if="article.gallery" v-html="article.gallery"
