პოლიციელებისგან შორს ეს ბინძური ხელები! ამ შემთხვევაში, მე ვგულისხმობ არა მომიტინგეს, არამედ იმ ხელებს, რომელიც საცეცებივით, ასე ცუდი, ნეგატიური, ბოროტი პიარის სახით უპირისპირდება ქვეყანას და უპირისპირდება პოლიციას, - ამის შესახებ უმრავლესობის ლიდერმა, მამუკა მდინარაძემ ჟურნალისტებს პარლამენტში განუცხადა.

მანამდე კი, მდინარაძემ ისაუბრა აქციაზე დაშავებული ადამიანების ფოტოების ჩვენებაზე. როგორც მან აღნიშნა, მათი „ძირითადი ნაწილი, არიან პოლიციაზე მოძალადეები და შემდეგ დაზიანებულები ამ ხელჩართულ ორთაბრძოლაში“.

ამასთან მან აღნიშნა, რომ ძალადობა ცალმხრივად არ დაუგმიათ.

„არ მოვრიდებივართ იმის თქმას, რომ ცალმხრივად არ დაგვიგმია მხოლოდ პოლიციელზე ძალადობა, მეორე მხრიდან ეს არ გვესმის. ისინი გმობენ მარტო ერთი მხრივ რაღაცას და მეორე მხრივ, თითქოს პოლიციელი საერთოდ არ არის ადამიანი. ახლა რა უნდა ვქნათ, ჩვენც ალბათ უნდა დავბეჭდოთ დაზიანებული პოლიციელების სხეულები, სახეები, თან ეს პოლიციელები ერიდებიან, ხომ, არ უნდათ, თავმოყვარეობის ამბავიც არის, დასახიჩრებული სახეების ჩვენება, ვიღაცას არ ერიდება.

150 დასახიჩრებული პოლიციელის დასახიჩრებული სახე და სხეულები, რა ვქნათ ახლა, ცალ-ცალკე ჩამოვატაროთ და ფოტოები დავბეჭდოთ და ამით შევეჯიბროთ ერთმანეთს? რომ აბევრებენ რაღაცებს“, - განაცხადა მდინარაძემ.

ამასთან, მისი თქმით, „რევოლუციას ყური არ უნდა შევაჩვიოთ“.

„მშვიდობიანი ჰქვია ამ მომიტინგეებს? მშვიდობიანს ვინ ეძახდა, რაღაც ელემენტარულ შეურაცხყოფას რომ მიაყენებდა, საქართველოში ამ დროს, მშვიდობიანად არ ითვლებოდა ხოლმე და ახლა „მოლოტოვის კოქტეილს“ რომ ესვრიან, მაინც მშვიდობიანს [უწოდებენ]. ამას იმიტომ გვაჩვევენ, რომ ოდესღაც იქნებ, რევოლუცია მოახდინონ და არ უნდა შევეჩვიოთ, ეს ყურს არ უნდა შევაჩვიოთ“, - აღნიშნა მდინარაძემ.