ასეთი ტიპის აქციები “ქართულ ოცნებას” დიდ ტვირთად დააწვება. ხელისუფლება ცდილობს, წნეხს ძალით უპასუხოს, მაგრამ ასე მარტივად ვერ ჩაივლის , - ამის შესახებ იურისტმა, ნიკა სიმონიშვილმა უზენაეს სასამართლოსთან იურისტების აქციაზე განაცხადა.

სიმონიშვილის თქმით, საზოგადოება ერთსულოვანია იმაში, რომ ქვეყანა წინ უნდა წავიდეს, ევროპის მიმართულებით.

“ის პროტესტი, რომელიც მთელ ქვეყანაში მიმდინარეობს, მხოლოდ საღამოს არ იმართება, დღის აქციების სახე მიიღო.დღის განმავლობაში, სხვადასხვა სფეროს წარმომადგენელი გამოვდივართ და ვაპროტესტებთ იმას, რაც ქვეყანაში ხდება. ვაპროტესტებთ ქვეყნის ევროპული კურსის ცვლილებას. ვაპროტესტებთ იმ უსამართლობას, რომელიც “ქართულმა ოცნებამ” ქვეყანაში გაგვიმეფა. ვაპროტესტებთ ქვეყნის კონსტიტუციიდან ხელის აღებას.

ვფიქრობ, რომ ასეთი ტიპის აქციები “ქართულ ოცნებას” დიდ ტვირთად დააწვება. ხელისუფლება ცდილობს ამ წნეხს ძალით უპასუხოს, მაგრამ ეს ასე მარტივად ვერ ჩაივლის, რადგან საზოგადოება ერთსულოვანია.

საზოგადოება ერთსულოვანია იმაში, რომ ქვეყანა წინ უნდა წავიდეს, ევროპის მიმართულებით. ჩვენ გვჭირდება დემოკრატიული რეფორმები, ძლიერი ინსტიტუციები და არა ერთი კაცის ნათქვამზე დატრიალებული ქვეყანა”,- განაცხადა ნიკა სიმონიშვილმა.