პანამის არხის და მიმდებარე ტერიტორიის ყოველი კვადრატული მეტრი ეკუთვნის პანამას და ასე გაგრძელდება, - ამის შესახებ პანამის პრეზიდენტმა, ხოსე რაულ მულინომ განაცხადა, რომელიც პანამის არხზე კონტროლის ხელახლა დაწესების შესახებ აშშ-ის პრეზიდენტის, დონალდ ტრამპის მუქარას გამოეხმაურა.

მისივე თქმით, პანამის დამოუკიდებლობის საკითხი მოლაპარაკებებს არ ექვემდებარება და რომ ჩინეთს არანაირი გავლენა არ აქვს არხის ადმინისტრაციაზე.

მანამდე, აშშ-ის პრეზიდენტმა, დონალდ ტრამპმა პანამის არხით ამერიკული გემების მიმოსვლის მაღალი ტარიფების გამო უკმაყოფილება გამოთქვა. ამასთან, მისი თქმით, შეერთებული შტატები არ დაუშვებს არხი "არასწორ ხელში" მოხვდეს, რაშიც მან ჩინეთის პოტენციური გავლენა იგულისხმა.

მისი თქმით, არხი შეერთებულმა შტატებმა პანამას და პანამელ ხალხს გადასცა, მაგრამ გარკვეული დებულებებით.

„თუკი ამ დიდსულოვანი ჟესტის პრინციპები, როგორც მორალური, ისე იურიდიული არ იქნება დაცული, მაშინ ჩვენ მოვითხოვთ, რომ დაგვიბრუნონ პანამის არხი სრულად და სწრაფად“, - აღნიშნა ტრამპმა.

პანამის პრეზიდენტის საპასუხო განცხადების შემდეგ დონალდ ტრამპმა სოციალურ ქსელ Truth Social-ში დაწერა: „ამას ვნახავთ“ და გამოაქვეყნა არხის ფოტო აშშ-ის დროშის ფონზე და წარწერით: „კეთილი იყოს თქვენი მობრძანება აშშ-ის არხში“.