ვიკრიბებით, რომ შევაჯეროთ მოსაზრებები, ბუნებრივია, შემდეგ აუცილებლად იქნება პრეზიდენტთან კოორდინაცია , - ამის შესახებ „ერთიანობა ნაციონალური მოძრაობის“ ერთ-ერთმა ლიდერმა, გიგი წერეთელმა ოპოზიციური პარტიების სამუშაო შეხვედრის დაწყებამდე განაცხადა.
გიგი წერეთლის განცხადებით, შეხვედრისას მიმდინარე პროცესებზე და პროტესტის მთავარ მოთხოვნაზე - დაინიშნოს ხელახალი არჩევნები, ისაუბრებენ.
„პროტესტის მოთხოვნაა, ახალი არჩევნები და ჩვენც ვხედავთ, რომ კრიზისის განმუხტვის მთავარი გზა სწორედ ეს არის. პრეზიდენტმა გუშინ ძალიან მკაფიოდ ისაუბრა ამაზე მიუხედავად იმისა, რომ ხელი შეუშალეს. მან მკაფიოდ თქვა, რომ გააგრძელებს აქტიურ ჩართულობას და ბრძოლას საზოგადოებასთან ერთად იმისათვის, რომ გათავისუფლდნენ ადამიანები, ვინც დაკავებულები არიან პროტესტის დროს. გვექნება მსჯელობა, როგორ ვხედავთ ამ პროცესს, ამ პერიოდს, მომდევნო დღეებს. ყოველდღე არის ქმედება, ჩვენი პარტნიორების პასუხი, რაც ხდებოდა და ხდება საქართველოში. ჩვენ გვინდა, რომ ეს გზა გავიაროთ სწორად და იმ მოთხოვნების შესაბამისად, რაც არის საზოგადოებრივ კონტექსტთან კონტექსტში“, - განაცხადა გიგი წერეთელმა.
