Politico - ჯო ბაიდენმა 895 მილიარდი დოლარის ოდენობის თავდაცვის ბიუჯეტი დაამტკიცა
აშშ-ის პრეზიდენტმა ჯო ბაიდენმა 895 მილიარდი დოლარის ოდენობის თავდაცვის ბიუჯეტი დაამტკიცა, - ამის შესახებ ინფორმაციას Politico თეთრ სახლზე დაყრდნობით ავრცელებს.
აშშ-ის ეროვნული თავდაცვის ავტორიზაციის საბოლოო აქტი, რომელიც აშშ-ის კონგრესის ორივე პალატამ ორპარტიული მხარდაჭერით მიიღო, სადავო კულტურულ საკითხებს არ შეიცავს, როგორიც აბორტთან დაკავშირებული სხვადასხვა ზომები და პენტაგონის მიერ შეიარაღებული ძალების შემადგენლობაში განსხვავებულობის ხელშეწყობაა.
ამასთან, აშშ-ის წარმომადგენლთა პალატის სპიკერის, მაიკ ჯონსონის მოთხოვნით, ბიუჯეტის კანონპროექტში შეტანილი დებულება შეიარაღებული ძალების Tricare ჯანდაცვის სისტემის მიერ გენდერული დისფორიის მკურნალობას კრძალავს.
თეთრი სახლის მიერ გავრცელებულ განცხადებაში აშშ-ის პრეზიდენტმა, ჯო ბაიდენმა აღნიშნული დებულება გააკრიტიკა.
„ეს ნაწილი ძირს უთხრის ჩვენი შეიარაღებული ძალების უნარს, მისი შემადგენლობა დააკომპლექტოს და შეინარჩუნოს მსოფლიოში საუკეთესო მებრძოლი ძალით, ჩვენი სამხედრო მოსამსახურეების ათასობით შვილის ჯანმრთელობის დაზღვევაზე უარის თქმის გზით. ჩვენი ქვეყნის სამსახურში ყოფნასა და ოჯახის ჯანმრთელობის დაზღვევაზე ხელმისაწვდომობას შორის არჩევანის გაკეთება არცერთ სამხედრო მოსამსახურეს არ უნდა მოუწიოს“, - განაცხადა ჯო ბაიდენმა.
ჯო ბაიდენის მიერ დამტკიცებული ბიუჯეტი თავდაცვის დეპარტამენტისთვის 850 მილიარდს და ბირთვული იარაღის პროგრამებისთვის 33,5 მილიარდ დოლარს ითვალისწინებს.
v-if="article.gallery" v-html="article.gallery"
