ანტონიო გუტერეში იემენსა და ისრაელს შორის ესკალაციას გმობს
გაერო-ს გენერალური მდივანი, ანტონიო გუტერეში ჰუსიტ მეამბოხეებსა და ისრაელს შორის საომარი მოქმედებების ესკალაციას გმობს.
ინფორმაციას The Guardian-ი ავრცელებს.
„გენერალური მდივანი გმობს იემენსა და ისრაელს შორის ესკალაციას. განსაკუთრებით შემაშფოთებელია ისრაელის საჰაერო თავდასხმები სანას საერთაშორისო აეროპორტზე, წითელი ზღვის პორტებსა და იემენის ელექტროსადგურებზე. დღევანდელი საჰაერო თავდასხმები მოჰყვა ჰუსიტების ესკალაციის გამომწვევ, დაახლოებით, ერთი წლიან ქმედებებს წითელ ზღვასა და რეგიონში, რაც საფრთხეს უქმნის მშვიდობიანი მოსახლეობას, რეგიონულ სტაბილურობას და საზღვაო ნავიგაციის თავისუფლებას“, - აღნიშნულია ანტონიო გუტერეშის პრესსპიკერის განცხადებაში.
ჯანდაცვის მსოფლიო ორგანიზაციის (WHO) ხელმძღვანელმა, ტედროს ადჰანომ გებრეიესუსმა სოციალურ მედიაში გუშინ გამოქვეყნებულ პოსტში განაცხადა, რომ იემენის დედაქალაქ სანას აეროპორტში თვითმფრინავში ასვლას აპირებდა, როდესაც საჰაერო თავდასხმა განხორციელდა, რის შედეგადაც თვითმფრინავის ეკიპაჟის წევრი დაშავდა და აეროპორტში სულ მცირე ორი ადამიანი დაიღუპა.
ტედროს ადჰანომ გებრეიესუსის ინფორმაციით, ის იემენში ჰუსიტების მიერ დაკავებული გაერო-ს თანამშრომლების გათავისუფლებაზე მოლაპარაკებების წარმოებისა და ადგილზე არსებული ჰუმანიტარული სიტუაციის შესაფასებლად იმყოფებოდა.
v-if="article.gallery" v-html="article.gallery"
