საერთო-სამოქალაქო მოძრაობა „მრავალეროვანმა საქართველომ“ სამცხე-ჯავახეთის საოლქო პროკურატურას, წინასაარჩევნო პერიოდში ორგანიზაციის გრძელვადიანი დამკვირვებლების მიერ დაფიქსირებული ფაქტების შესახებ მასალები მიაწოდა, რომლებიც მათივე ცნობით, მმართველი პარტიის მიერ ადმინისტრაციული რესურსის (ფინანსური, ინსტიტუციური, ზემოქმედების) სავარაუდო გამოყენებასა და წინასაარჩევნო კამპანიის წარმოების წესის სავარაუდო დარღვევას შეეხებოდა.

ამის შესახებ ინფორმაციას საერთო-სამოქალაქო მოძრაობა „მრავალეროვანი საქართველოს“ პრესსამსახური ავრცელებს.

მათივე ცნობით, მასალების მიწოდებას წინ საერთო სამოქალაქო მოძრაობა „მრავალეროვანი საქართველოს“ თავმჯდომარის სამცხე-ჯავახეთის საოლქო პროკურატურაში გამოკითხვაზე დაბარება უძღოდა.

„მიმდინარე წლის 18 ნოემბერს, „მრავალეროვანი საქართველოს“ თავმჯდომარეს არნოლდ სტეფანიანს დაუკავშირდა სამცხე-ჯავახეთის საოლქო პროკურატურის წარმომადგენელი და მოითხოვა მისი გამოკითხვა.

გამოკითხვის საგანს „მრავალეროვანი საქართველოს“ თავმჯდომარის მიერ მიმდინარე წლის 22 ოქტომბერს ტელეკომპანია „მთავარი არხის“ ეთერში გაჟღერებული მიგნებები წარმოადგენდა, რის შესაბამისადაც, „ქართული ოცნება“ სამცხე-ჯავახეთის რეგიონში წინასაარჩევნო პერიოდში იყენებდა ადმინისტრაციულ რესურს. გამოკითხვა 26 ნოემბერს შედგა.

შესაბამისად, მხარეთა შორის შეთანხმების საფუძველზე, „მრავალეროვანმა საქართველომ“ საოლქო პროკურატურას წარუდგინა მის ხელთ არსებული ყველა ინფორმაცია, რომელიც მმართველი პარტიის მიერ წინასაარჩევნო პერიოდში ადმინისტრაციული რესურსების სავარაუდო გამოყენებასა და წინასაარჩევნო კამპანიის წარმოების წესის სავარაუდო დარღვევას შეეხება”, - ნათქვამია ინფორმაციაში.