ბელარუსის პრეზიდენტმა, ალექსანდრე ლუკაშენკომ საპროტესტო აქციებზე დაკავებული 20 ადამიანი შეიწყალა, - ამის შესახებ ინფორმაციას ბელარუსის სახელმწიფო საინფორმაციო სააგენტო „ბელტა“ ავრცელებს.

„ალექსანდრე ლუკაშენკომ ექსტრემისტული ხასიათის დანაშაულის ჩამდენი 20 ადამიანის შეწყალების შესახებ კიდევ ერთ განკარგულებას ხელი მოაწერა. შეწყალების შესახებ განცხადება ყველა მათგანმა შეიტანა და მათ ჩადენილი ქმედებები მოინანიეს“, - წერს „ბელტა“.

ბელარუსის სახელმწიფო საინფორმაციო სააგენტოს ცნობით, გათავისუფლებულთა შორის 11 ქალია, 14-ს ქრონიკული დაავადება აქვს და 10-ს შვილი ჰყავს.

გათავისუფლების შემდეგ მათ ქცევას ბელარუსის შინაგან საქმეთა სამინისტრო დააკვირდება.