სააკაშვილმა თავის თავს უნდა მიხედოს, მას უამრავი დანაშაული აქვს ჩადენილი ქართული სახელმწიფოს და ქართველი ხალხის წინაშე, - ამის შესახებ პრემიერ-მინისტრმა ირაკლი კობახიძემ განაცხადა.

აღნიშნულით მან ჟურნალისტის კითხვას უპასუხა, თუ რას იტყოდა სააკაშვილის განცხადებაზე რომლის მიხედვითაც, „საქართველოში თავისუფალი არჩევნები ძალიან მალე ჩატარდება, მაგრამ ეს მხოლოდ მას შემდეგ მოხდება, რაც ქართველი ხალხი ივანიშვილის ზვიგენის აკვარიუმის ფონზე სელფს გადაიღებს“.

„სააკაშვილს მეტი სიფრთხილისკენ მოვუწოდებდი, რა თქმა უნდა, ცარიელი სიტყვებია მისი ყველა განცხადება, არავითარი ფასი და დატვირთვა ამ განცხადებებს არ აქვს, მაგრამ სააკაშვილმა თავის თავს უნდა მიხედოს, მას უამრავი დანაშაული აქვს ჩადენილი ქართული სახელმწიფოს და ქართველი ხალხის წინაშე. აქედან გამომდინარე, მის ადგილზე უფრო ფრთხილად მოვეკიდებოდი განცხადებების გაკეთებას“, - განაცხადა კობახიძემ.

მისივე თქმით, ახლა „რადიკალური ოპოზიცია თვითლიკვიდაციის რეჟიმშია“.

„ამაშია ჩარჩენილი რადიკალური ოპოზიცია და როგორც მოგეხსენებათ, მიხეილ სააკაშვილია მათი ლიდერი. ყველას მოვუწოდებ, თვითლიკვიდაციის რეჟიმიდან გამოვიდნენ, რეალურად, რადიკალური ოპოზიცია თვითლიკვიდაციის რეჟიმშია, სააკაშვილის ეს განცხადებაც ამის გამოძახილია. ეს თვითლიკვიდაციის რეჟიმი ქვეყნისთვის კარგია, რადიკალური ოპოზიციისთვის ცუდია. შესაბამისად, მათი არჩევანია, რას გააკეთებენ“, - განაცხადა კობახიძემ.