2025 წლიდან, გზისპირა ზონებში, გადამზიდველების საგზაო ინსპექტირება განხორციელდება. იანვრიდან ძალაში შედის “საგზაო მოძრაობის შესახებ“ კანონში განხორციელებული ცვლილებები, რომლის თანახმად, გზისპირა ზონაში საგზაო ინსპექტირებას “M2“, “M3“, “N1“, “N2“, “N3“, “O3“, “O4“ კატეგორიის სატრანსპორტო საშუალებები დაექვემდებარება.

შემოწმდება შემდეგი საკითხები: - სახიფათო ტვირთის გადაზიდვის წესების დაცვა; მძღოლის შრომისა და დასვენების რეჟიმის დაცვა და საკონტროლო მოწყობილობის (ტაქოგრაფის) ელექტრონული ბარათის გამოყენება; სატრანსპორტო საშუალების ტექნიკური გამართულობა; ტვირთის ძარაზე დამაგრების წესების დაცვა; საერთაშორისო საავტომობილო გადაყვანასთან/გადაზიდვასთან დაკავშირებული შესაბამისი სანებართვო დოკუმენტის გამოყენების წესების დაცვა; საკონტროლო მოწყობილობის და სიჩქარის შემზღუდველი მოწყობილობის მონტაჟისა და კალიბრაციის წესების დაცვა; სატრანსპორტო საშუალების მასა და გაბარიტები.

გზისპირა ზონაში საგზაო ინსპექტირებას შინაგან საქმეთა სამინისტროს დახმარებით, ეკონომიკისა და მდგრადი განვითარების სამინისტროს სისტემაში შემავალი – სახმელეთო ტრანსპორტის სააგენტო განახორციელებს. გზისპირა ზონაში საგზაო ინსპექტირების წესი მთავრობის დადგენილებით განისაზღვრება.

მონიტორინგის შედეგად გამოვლენილ დარღვევაზე დაწესებულია ადმინისტრაციული პასუხისმგებლობა, დარღვევის ხარისხის შესაბამისად - 500 ლარიდან 5 000 ლარის ოდენობით.

2025 წლიდან კულტურისა და სპორტის სამინისტროს ბაზაზე ორი ერთმანეთისაგან დამოუკიდებელი უწყება - კულტურის სამინისტრო და სპორტის სამინისტრო ამოქმედდება.

პარლამენტის მიერ დეკემბრის თვეში მიღებული კანონი, რომლის საფუძველზეც კულტურისა და სპორტის სამინისტრო გაიყო, 1-ელი იანვრიდან ძალაში შევიდა.

კულტურის მიმართულებით კულტურისა და სპორტის სამინისტროს ფუნქციები და უფლებამოსილებები კულტურის სამინისტროს გადაეცა, ხოლო სპორტის სამინისტრო შესაბამისი დარგობრივი მიმართულებით მინიჭებულ უფლებამოსილებებს განახორციელებს.

არსებული ინფორმაციით, კულტურისა სამინისტროს თინათინ რუხაძე უხელმძღვანელებს. პრემიერ-მინისტრმა სპორტის მინისტრის თანამდებობაზე შალვა გოგოლაძე დაასახელა.

რეჟიმისთვის ახალი წელი არ არსებობს, ამ წუთებშიც ათეულობით საჯარო მოხელეს სამსახურიდან ათავისუფლებენ, - ამის შესახებ პარტია „გახარია საქართველოსთვის“ თავმჯდომარის მოადგილე, ნათია მეზვრიშვილი „ფეისბუქის“ გვერდზე წერს.

მისი შეფასებით, ახლოა დრო, ბიზნესი გვერდით დაუდგეს საჯარო მოხელეებს და პატიმრების გათავისუფლებასთან ერთად, მათი აღდგენა მოითხოვოს.

„ოცნებამ“ ამ მხრივაც რეკორდი მოხსნა. არასოდეს ყოფილა განსხვავებული აზრის (მითუმეტეს, კონსტიტუციის დაცვის) გამო, მოხელეების მიმართ ამ მასშტაბის რეპრესიები. რეალურად ფეხში ისვრიან იმიტომ, რომ სახელმწიფოს აცლიან ხერხემალს. რაც მეტს გაუშვებენ, უფრო სწრაფად ჩამოიშლებიან. ახლა არის დრო, ბიზნესი გვერდით დაუდგეს მოხელეებს და პატიმრების გათავისუფლებასთან ერთად, მოვითხოვოთ მათი აღდგენა. ივანიშვილი ეცდება ყველა სიბნელე ახალი წლის დღეებში ააკეთოს. ამიტომ, ფხიზლად უნდა ვიყოთ“, - წერს მეზვრიშვილი სოციალურ ქსელ “ფეისბუქში“.

თბილისის მერიის ინფორმაციით, ორბელიანის მოედანზე მოწყობილი საახალწლო სოფელი 14 იანვრამდე გააგრძელებს მუშაობას.

ამის შესახებ თბილისის მერმა, კახა კალაძემ ვიდეომიმართვაში აღნიშნა.

კალაძის თქმით, აღნიშნული გადაწყვეტილების მიზეზი „უამრავი წერილი" გახდა, რომელიც საახალწლო სოფლის გახანგრძლივებას შეეხებოდა.

„ჩვენ განცხადება გვქონდა გაკეთებული იმასთან დაკავშირებით, რომ ჩვენი საშობაო სოფელი 7 იანვარს დაიხურებოდა, თუმცა ძალიან ბევრი წერილი შემოვიდა მის გახანგრძლივებასთან დაკავშირებით. შესაბამისად, მივიღეთ გადაწყვეტილება, რომ საახალწლო სოფელი მუშაობას 14 იანვრამდე გააგრძელებს. იცით, რომ 2017 წლიდან ჩვენ ჩამოვაყალიბეთ ეს ტრადიცია, შევქმენით ადგილი, სადაც უამრავი ადამიანი იკრიბება საახალწლო სოფლის სახით და ყოველწლიურად, ის უფრო მასშტაბური და დიდი ხდება. წელსაც განსაკუთრებით ლამაზია ჩვენი საახალწლო სოფელი, რომელსაც უამრავი ადამიანი სტუმრობს, როგორც დედაქალაქის მცხოვრებლები, ისე რეგიონებიდან ჩამოსული სტუმრები, ტურისტები. მართლაც სასიამოვნო გარემოა. გვაქვს ძალიან დიდი ყინულის მოედანი, რომლის მასშტაბის მოედანიც არასდროს ყოფილა“,- განაცხადა კახა კალაძემ.

ამასთან, დედაქალაქის მერი ვიდეომიმართვაში ეხმიანება ინფორმაციას საზოგადოებრივი ტრანსპორტის მუშაობასთან დაკავშირებითაც.

„ვრცელდებოდა ცრუ ინფორმაცია, იმასთან დაკავშირებით, რომ თითქოს, ახალი წლის ღამეს საზოგადოებრივი ტრანსპორტი მუშაობას 00:00 საათზე ამთავრებდა. ეს იყო არასწორი ინფორმაცია. როგორც ყოველთვის, თუ პანდემიას არ ჩავთვლით, ახალი წლის ღამეს 03:00 საათამდე, მუშაობდა საზოგადოებრივი ტრანსპორტი, როგორც მეტრო, ასევე ავტობუსები. იგივე იქნება ახლაც, არავინ შეგიყვანოთ შეცდომაში“, - აღნიშნავს კალაძე.

ახალ ზელანდიასა და მსოფლიოს რამდენიმე ქვეყანაში ახალი, 2025 წელი დადგა , - ამის შესახებ ინფორმაციას BBC-ი ავრცელებს.

დედამიწაზე პირველმა ახალი, 2025 წელი კირიბატის რესპუბლიკამ თბილისის დროით 14:00-ზე იზეიმა, ხოლო ერთი საათის შემდეგ ახალ წელს ახალი ზელანდიის მოსახლეობა შეხვდა. ახალი, 2025 წელი ტონგასა და სამოაშიც დადგა.

ავსტრალიის მოსახლეობა ახალი წლის დადგომას თბილისის დროით 17:00-ზე, სიდნეის საახალწლო ფოიერვერკების გრანდიოზული შოუს ფონზე იზეიმებს.